Yu tingting long marit? Pastaim yutupela marit, wanem ol samting i bikpela long toktok wantaim? Ol disisen bilong marit i wanpela bikpela disisen long laip bilong yu. Bipo yu marit, askim dispela ol askim long man o meri husat yu gat laik long maritim.

Ol bilip bilong ol Kristen

• Yu bilip long God Triwan (Papa, Pikinini na Holi Spirit) olsem Baibel i tok long Em?
• Yu save na bilip long gutnius bilong Jisas Krais; Em i kamap man, Em i dai long sin bilong yumi, na Em i go antap long heven olsem Bikpela?
• Yu gat bikpela laik tru tru long bihanim Jisas Krais?
• Olgeta tingting na pasin bilong yu i save stap aninit long tok bilong God?

Lotu laip bilong ol Kristen

• Yu save go long lotu na ol program bilong sios? Dispela ol samting em i bikpela samting long laip bilong yu?
• Yu save mekim wanem long lotu long God insait long laip bilong yu yet long wan wan de? (pasin bilong beten, pasin bilong ritim Baibel, pasin bilong putim ol tok bilong God long tingting)
• Yumi save beten na ritim Baibel wantaim nau? Husat bai i go pas long ritim Baibel na beten taim yumi marit?

Ol man na meri marit

• Baibel i mekim wanem tok long wok bilong man olsem het na wok bilong meri olsem em i mas stap aninit long man? Wok bilong man na meri i marit bai i kamap insait long marit bilong yutupela olsem wanem?
• Hau bai yumi tilim ol wok olsem wasim plet, wasim klos, klinim haus, kisim paiawut, senisim nepi, na kain samting olsem?
• Hau bai yumi mekim haptaim long stap wantaim wanpela narapela?
• Husat bai i bosim mani bilong yumi?

Ol pikinini

• Sapos yu inap makim, hamas pikinini yu tingting long kamapim?
• Hau bai yumi skulim ol pikinini long laikim tru God?
• Hau bai yumi stretim ol pikinini taim ol i bikhet o mekim rong?
• Yu ting wanem long skul? Yu ting em bikpela samting tru olsem ol piknini i mas go long wanpela Kristen skul?

Ol wokabaut

• Bai yumi stap wantaim ol lain bilong husat? Ol lain bilong man? Ol lain bilong meri? Narapela lain?
• Bai yumi i stap long wanem hap? Dispela hap em i gutpela hap long kamapim ol pikinini o mekim wok bilong Bikpela?
• Yumi save lukautim mani olsem wanem? Yu save bungim mani o yu save yusim tasol?
• Bai yumi givim hamas hap fotnait i go long sios?
• Husait bai bosim hau yumi yusim fotnait bilong yumi?

Ol amamas samting

• Wanem ol mak bilong ol muvi yumi bai lukim?
• Wanem ol stiatok bai yumi putim bilong ol pikinin i ken bihainim long lukim muvi (wanem em i gutpela na wanem muvi i no gutpela)? Hau bai yumi strongim dispela tingting? Bai yumi mekim wanem taim ol i brukim lo bilong yumi?
• Hau bai yumi lainim ol pikinini bilong yumi long ol i ken kisim gutpela tingting bilong skelim wanem ol pilai bai ol inap long pilai, wanem ol musik ol inap long harim na wanem ol muvi ol inap long lukim?

Ol hevi bilong femili

• Wanem ol samting o pasin i save mekim yu belhat?
• Yu save bosim o daunim belhat na belhevi bilong yu olsem wanem?
• Bai yumi i go long slip taim yumi belhat yet, o nogat?
• Sapos yumi i belhat wantaim wanpela narapela o yumi i no stap wanbel, yumi bai i go long husait long kisim helpim?

Ol wok

• Yu laikim wok bilong yu? Yu gat bikpela laik long mekim wanem kain wok? Hau bai yu inapim laik bilong yu long painim gutpela wok?
• Hau bai yumi kisim wokmani inap long sapotim femili bilong yumi yet?
• Yumi yet gat wanem wok bilong lukautim famili bilong yumi?
• Bai yumi wok gaden na lukautim abus? Long wanem hap? Dispela bai i givim inap kaikai long famili bilong yumi?

Ol helt bilong bodi na spirit

• Yu bin gat sampela sik bipo o yu gat sampela sik na hevi bilong bodi i stap yet long yu, o nogat? Dispela ol sik bai inap pasim yumi long stap gut wantaim? (ol sik olsem kensa, ol sik bilong kaikai, ol sik bilong pamuk)
• Yu ting wanem long eksasais na pasin bilong kaikai gutpela kaikai?
• Yu save bihainim sampela pasin nogut bilong bagarapim helt bilong yu olsem buai or smok?
• Yu save spak o lukim ol piksa nogut?

Ol samting i bin kamap long laip bilong yu long bipo

• Ol polis i bin holim yu o kalabusim yu bipo? Long wanem?
• Wanpela i bin mekim pasin nogut o pasin sem long yu taim yu yangpela?
• Yu bin mekim maritpasin olsem bungim bodi wantaim wanpela man o meri bipo?
• Bai yumi i tokim husat long ol dispela samting bilong kisim gutpela skul long stretim ol hevi bilong bipo?