Tok Giaman #4b

Prosperity Gospel – Olgeta Sik i Stap Autsait Long Blesing Bilong God

By Pastor Ryan deJonge

Las wik, em i hat tru long mi taim meri bilong mi i kisim malaria na tupela pikinini meri bilong mi i skin hat. Pikinini man bilong pren bilong mi tu i kisim bikpela malaria, na meri bilong en i gat bel i bin kisim malaria tupela taim insait long tupela wik. Na meri bilong narapela pren bilong mi i bin go long haus sik na ol dokta i bin operatim em {katim bel bilong em} na stretim sampela bagarap i kamap insait long bel bilong em.

Tasol dispela Prosperity Gospel i save tokim yumi olsem: God Em i gutpela God olsem na Em i no laik bai yumi sik. Satan tasol i save kisim ol sik i kam long yumi. God Em i no save mekim olsem. Satan tasol i wok long mekim yumi sik. Dispela Prosperity Gospel i tok, “Sapos God i stap wantaim yumi bai nogat wanpela bagarap olsem sik o hangre inap kam long yumi. Yumi bai i stap gut tru oltaim na bai yumi i no inap sot long mani na bai yumi gat planti gutpela samting.

Kenneth Copeland, wanpela tisa bilong dispela Prosperity Gospel, i tok olsem, ol sik i samting bilong bagarapim yumi tasol, olsem na wanpela sik i no inap kamap olsem blesing bilong God. Copeland i rait olsem:

Taim yumi tok olsem ol sik i ken kamap olsem wanpela blesing bilong God, dispela em i tok giaman bilong Satan. I no gat wanpela tok long Baibel i tok olsem ol sik i ken kamap olsem wanpela blesing bilong God. Nogat tru. Lo {Deuteronomy} 28:61-62 i tok olsem “olgeta sik” i samting bilong ol bagarap. As bilong sik em i samting nogut i kam long sin, na em i soim klia olsem Satan i no save laikim ol lain bilong graun.

Em i tok tru o nogat? Planti manmeri bilong Papua New Guinea i save kisim kain kain sik olsem Malaria, Aids, Typhoid, Dengue, TB na planti arapela sik.

Tasol askim i olsem:

God i lusim pinis olgeta pren na famili bilong yumi husat i sik, o nogat?
Ating ol manmeri husat i no save sik na stap gut tru em God i mas blesim ol pinis a?

Kenneth Copeland i tok olsem ol sik i no inap kamap olsem wanpela gutpela samting bilong God i kam long yumi.

Tasol dispela tok bilong Copeland i rong olgeta. Long wanem, God i save yusim ol sik bilong strongim bilip bilong yumi na bringim yumi i kam klostu moa yet long em. Ol sik i ken kamap olsem wanpela blesing bilong God.

I gutpela sapos yumi bekim dispela tingting bilong Copeland wantaim Tok Bilong God, olsem na kaman yumi lukluk long sampela vers bilong Buk Baibel. Yumi i no ken lukluk long wanpela liklik hap bilong Baibel tasol. Nogat. Yumi mas lukluk long olgeta hap bilong Baibel na painimaut Tok Bilong God i tok olsem wanem long ol sik na hevi bilong yumi long dispela graun?

Lo 8:2 — Yupela mas tingim gut God, Bikpela bilong yumi, i bin go pas long yupela na helpim yupela long dispela longpela wokabaut. Yupela i bin raun long ples wesan nating inap 40 yia. Na God i bin salim sampela hevi bilong traim yupela, bai Em i ken save, yupela inap bihanim olgeta lo bilong Em o nogat.

Taim ol Israel i stap 40 yia long ples wesan nating, planti bilong ol i bin kisim kain kain sik. Tingim dispela taim we ol snek i bin kaikaim ol. Dispela sik i bin kamap olsem wanpela blesing bilong God. Yes, em I tru olgeta. Ol sik i bin wok long mekim ol Israel i tanim bel long pasin bilong sakim tok bilong Bikpela na tok pait long wokman bilong God, Moses. God i bin yusim ol dispela hevi bilong traim ol pipel bilong Em.

Papa God i save salim ol traim na ol hevi na ol sik long ol pikinini bilong Em. Bilong wanem? Long soim yumi laikim tru bilong Em yet.

Kam, bai yumi lukluk gen long sampela moa vers bilong soim klia olsem God i save givim ol traim long yumi bilong blesim yumi.

Jems 1:2-4 — Ol brata bilong mi, sapos ol kain kain traim i kamap long yupela, orait yupela i ken ting olsem, em i samting bilong amamas tasol. Yupela i save, samting i kamap na i traim bilip bilong yupela, em i save kamapim pasin bilong sanap strong na karim hevi. Orait oltaim yupela i mas sanap strong na karim hevi, bai dispela pasin i ken kamap strong tru long yupela. Olsem na bai yupela i stap gut, na yupela bai i no sot long wanpela pasin bilong God. Nogat. Pasin bilong yupela bai i gutpela na i stret olgeta.

Ol sik i sampela bilong dispela “ol kain kain traim”? Dispela em tru na tru olgeta. Long dispela teks, Jems i no tok long wanpela kain traim tasol. Nogat. Em i bin tok long kain kain traim, olsem ol sik tu. Yumi i ken ting olsem, ol traim i samting bilong amamas tasol, long wanem, God i save wok long traim ol bilip bilong yumi na mekim bilip bilong yumi i kamap strong moa yet. Yumi i ken amamas tru long dispela!

1 Pita 1:6-7 — Yupela i save tingting long ol dispela samting God i laik mekim na yupela i save amamas. Tasol nau long liklik taim tasol, ating kain kain traim bai i kamap na givim pen long yupela. Long dispela pasin God i save traim bilip bilong yupela. Yumi save, gol em i gutpela samting tru, tasol ol i save kukim long paia, bilong traim na painimaut em i gol tru, o nogat. Bilip bilong yupela i winim gol na i gutpela moa, long wanem, gol em i samting bilong bagarap. Olsem na ol kain kain traim i kamap long yupela, em i bilong traim bilip na soim olsem, yupela i bilip tru long Krais. Na long las de, taim Jisas Krais i kamap ples klia, em bai i amamas tru long yupela na givim biknem long yupela.

Long hia tu, yumi ritim tok long “kain kain traim”. Ol sik i wanpela bilong dispela ol kain kain traim, o nogat? Mipela i no klia olgeta, tasol yumi i ken save gut olsem, God i save salim ol traim long yumi, long wanem, God i laik strongim bilip bilong yumi. Bilong wanem? Long mekim bilip bilong yumi i kamap strongpela moa. Na long dispela rot, laikim tru bilong yumi long Jisas Krais bai i kamap bikpela moa yet, na bai yumi i wok strong moa yet long honaim Em na apim nem bilong Em!

Buk Song 32:1-4 —Sapos God i lusim pinis rong bilong wanpela man, na i rausim sin bilong em, dispela man i ken amamas. Sapos Bikpela i tok olsem, dispela man i no gat rong nau, na dispela man i no save bihainim pasin giaman, orait dispela man i ken amamas. God, taim mi no autim sin bilong mi yet, mi krai nogut long san na long nait. Olsem na bodi bilong mi i slek olgeta. Long san na long nait han bilong yu i mekim save long mi. Strong bilong mi i lus olgeta, olsem bikpela san i boinim graun na graun i drai.

Taim Devit i tok olsem, “bodi bilong mi i slek olgeta”, em i tok long sampela kain sik i bin kisim em. Dispela Buk Song i soim yumi olsem, hevi bilong Devit i wok long mekim Devit i skelim laip bilong em na i go long God bilong askim Em long lusim sin bilong em. Dispela em i wanpela gutpela samting. Em i samting bilong amamas. David i tok olsem long vers 1: “dispela man i ken amamas”.

Taim yumi ritim na skelim olgeta tok long Buk Baibel, yumi bai save gut olsem, Papa God i save salim ol traim na ol hevi na ol sik long ol pikinini bilong Em. Bilong wanem? Long soim yumi laikim tru bilong Em yet. Ol tok bilong Kenneth Copeland, em i tok giaman stret. Tok bilong em i save paulim ol bilip lain. Na ol bai i gat dispela kain askim: Em i tru olsem God i bosim olgeta samting? Em i tru olsem God i laikim mi tru? Ol sik i no wok long bagarapim bilip bilong yumi. Nogat. Dispela Prosperity Gospel i wok long bagarapim bilip bilong yumi.

Tok bilong God i klia olgeta. God i save bosim olgeta samting bilong dispela graun. Romans 8:28 i tok olsem, God i save mekim olgeta samting i wok wantaim long mekim gut long ol man i save givim bel bilong ol long God. I no gat wanpela samting olsem sik, hangre, dai o ol spirit nogut inap pasim laikim tru bilong God insait long Jisas Krais. Dispela i gutnius tru tru!