Tasol planti man i save bihainim ol giaman tok bilong Satan, na ol i mekim dispela pasin bilong baim meri long bagarapim stret dispela pasin bilong marit.  God yet i givim dispela pasin bilong marit olsem wanpela gutpela presen i kam long yumi na yumi no ken bagarapim.  Na i gat sampela taim ol man i save mekim dispela pasin bilong baim meri, olsem na ol i ken bagarapim meri bilong ol long laik bilong ol yet.

Daunbilo long hia yu ken lukim mi bin makim ol sampela bikpela hevi tru i save kamap taim yumi i bihainim pasin bilong baim meri:

• Taim yumi baim wanpela meri em bai pasim yumi long luksave olsem God yet i givim wanpela meri long man. Stat 2:18-24 i skulim yumi olsem God yet i kamapim dispela pasin bilong marit.  Em yet i kamapim dispela pasin bilong wanpela man na wanpela meri i kam bung na pas wantaim long marit.  Pasin bilong marit em i samting God yet i kamapim, na i no man i kamapim.
• Dispela pasin bilong baim meri i save kamapim kain pasin nogut olsem: ol man i save maritim planti meri o ol bai rausim wanpela meri na baim narapela meri.  Tasol Baibel i tok long Matyu 19:4-6, “’Olsem na man i save lusim papamama na i pas wantaim meri bilong en, na tupela i kamap wanpela bodi tasol.’ God i tok olsem na tupela i no i stap olsem tupela moa.  Tupela i kamap olsem wanpela bodi.  Olsem na samting God i pasim pinis, em man i no ken katim.”  Yumi ken klia olgeta olsem God i no laikim tru pasin bilong brukim marit na pasin bilong maritim planti meri.  Na Satan i save mekim dispela tupela pasin nogut long bagarapim planti ol marit na famili wantaim.
• Pasin bilong baim meri i save kamapim kainkain tingting nogut. Ol lain i save ting olsem ol meri i kain olsem wanpela samting nating ol i baim pinis, olsem na ol i ken mekim kain kain samting long dispela meri long laik bilong ol yet.  Ol man na olgeta famili bilong ol i save tok, “Meri em i bilong mi, ya!  Em i kago bilong mi yet.”  Ol narapela tu i save tok, “Em i bisnis bilong mi, ya!”  Olsem na dispela pasin bilong baim meri i kamap bikpela moa yet.  Wanpela taim mi bin harim tok long wanpela pe bilong baim meri i  olsem K 100,000 wantaim K30,000 gaden kaikai, ol samting bilong stoa na ol animal.  Na olgeta taim dispela pe ol i mas baim em i winim K5,000 – $10,000 samting.  Na taim wanpela man i baim meri pinis, em i ting olsem em yet i bosim meri bilong em nau.  Em i samting bilong em yet.  Olsem tasol em inap long mekim wanem samting em i gat laik long mekim long dispela meri:  Em i ken paitim em, em i ken bagarapim em, em i ken mekim meri bilong em i kamap olsem wokboi nating long haus o long gaden.  Bilong wanem?  “Bikos mi baim em pinis!  Em i samting bilong mi!”  Tarangau!  Dispela em i tok giaman stret na dispela tok giaman i wok long karamapim PNG olgeta.  Na ol meri i no inap autim laik bilong ol yet!
• Na sapos wanpela meri i no inap karim pikinini, man bilong em bai paitim em o rausim em o kisim narapela meri i kam stap wantaim tupela. Na bai meri bilong em i no inap tok nogat long dispela.  Sapos em i mekim olsem, ating man bilong em bai rausim em wantu.  Tasol Baibel i soim klia olsem sampela taim God bai i no givim pikinini long sampela meri long laik bilong Em yet.  Em i samting bilong God.

Yumi mas luksave long ol dispela tok giaman bilong Papa bilong tok giaman, Satan yet.

Satan em i gat bikpela laik stret long bagarapim pasin bilong marit, long bagarapim ol famili, na long bagarapim laikim tru na pasin bilong wanbel insait long marit.  Yumi mas tingim tok bilong God long Stat 2:22-23: “Orait God i wokim wanpela meri long dispela bun Em i bin kisim long man, na bihain Em i bringim meri i go long man.  Man i lukim meri na em i tok olsem, ‘Em nau.  Em i poroman tru bilong mi.  Bun bilong em i kamap long bun bilong mi, na mit bilong em i kamap long mit bilong mi.  God i wokim em long bun bilong mi, olsem na bai mi kolim em “meri.”’”

Harim!  Ol meri i no samting nating bilong baim long wanpela stoa!  Nogat, em i meri God yet i wokim!

Em i kam long bun bilong man, na dispela i min olsem em inap long man yet, na bel bilong man i mas amamas long em.  Meri em i wanpela hap bilong bodi bilong man bilong em.  Olsem na man bilong em i mas laikim em tru, lukautim em gut tru, na stap wantaim em olsem wanpela meri tasol bilong em .

Sapos yu yet i bihainim ol dispela tok giaman na yu bin mekim sin long dispela ol pasin, yu mas go long Krais.  Askim God long lusim sin bilong yu long blut tudia bilong Krais.  Na go na laikim tru meri bilong yu olsem poroman bilong yu, na helpim bilong yu.  Stap wanbel wantaim em bikos em i wanpela presen God yet i givim yu.  God Em i pulap long marimari, na Em bai i redi long helpim yumi sapos ol tok giaman bilong Satan i wok long bagarapim marit bilong yumi.

Jisas i tok, “Tru tumas mi tokim yupela, man i harim tok bilong mi, na i bilip long Papa, Em i bin salim mi na mi kam, Em i gat laip i stap gut oltaim oltaim.  Em bai i no gat kot. Nogat.  Em i lusim dai pinis, na nau Em i stap laip”.  Bilipim dispela tok tru, na laip na marit bilong yu bai i senis!

Olsem na: “Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong Em yet bilong helpim sios.  Long wara na long tok bilong en, Krais i wasim sios na mekim em i kamap klin long ai bilong En” (Efesus 5:25-26).