God i gat plen long Marit bilong yu
By Pastor Ian Wildeboer
Yu gat wanpela plen bilong marit bilong yu, o nogat?
Yu marit pinis, o nogat?
Yu gat laik long marit long wanpela de, o nogat?
Yu tingting long marit gen, o nogat, sapos man o meri bilong yu i dai pinis?
Sapos yu bekim “yes” long wanpela bilong dispela ol askim, orait yu mas ritim dispela artikel!
Mi save olsem yu laik bai marit bilong yu i ken i stap gut tru. Long taim bilong marit, i no gat wanpela man o meri i save tingting olsem: Mi gat laik bai marit bilong mi i ken bagarap na stap nogut tru. Mi laik olsem mitupela bai i bel hevi tru long marit, na brukim marit bilong mitupela sampela yia bihain. Mi laik olsem man bilong mi i ken paitim mi, bagarapim mi, na givim hevi long mi. Mi laik bai meri bilong mi i sakim tok bilong mi, lukluk long narapela man o kain olsem.
Em, nogat tru!
Taim yumi i marit pinis, em i samting bilong laikim tru, na yumi i save prea olsem marit bilong yumi bai kamap gutpela na naispela tru, na bai yumi i stap wanbel, na laikim tru na bel isi i ken karamapim marit bilong yumi i go inap long taim yumi i dai.
Olsem na, wanem samting tru bai i inap long helpim marit bilong yu i stap gut, na man na meri i ken stap strong moa yet long olgeta yia?
Plen bilong God long marit i ken helpim yu!
Tingim: God i save – na save bilong em i winim save bilong yu – wanem samting em i gutpela samting long marit bilong yu. Tingim: God yet i wokim marit! Olsem na Em i laikim tru marit!
Olsem na, sapos yumi harim Tok bilong Em na kisim save long plen bilong Em long marit bilong yumi, na sapos yumi i larim God i stap namel tru long marit bilong yumi, orait marit bilong yumi bai inap long stap olsem wanpela naispela na gutpela samting stret, na marit bilong yumi bai i stap strong inap long taim yumi i dai. Jisas i tok olsem, “Sapos yupela i lusim mi, yupela i no inap mekim wanpela samting” (Jon 15:5).
Dispela plen bilong marit i stap long Baibel
Sapos yumi laik save gut long plen bilong God long marit, yumi mas opim Baibel bilong yumi na ritim. Plen bilong God long marit i stat long taim God i wokim Adam tupela Iv long taim Em i wokim dispela graun.
Long namba wan siapta bilong Buk Stat, God i tokim Adam tupela Iv olsem, “Yupela i mas kamap planti na i go sindaun long olgeta hap bilong graun na bosim olgeta samting i stap long en. Mi putim ol pis na ol pisin na olkain animal bilong graun aninit long yupela.”
Na bihain, long siapta tu long Stat, Bikpela i soim yumi hau Em yet i wokim Iv (long wanpela bun long banis bilong Adam). Na long hia yumi i ritim namba wan tok long marit: “Olsem na dispela pasin i kamap. Man i save lusim papamama na i pas wantaim meri bilong en, na tupela i kamap wanpela bodi tasol” (Stat 2:24). Dispela em i wanpela naispela piksa stret long pasin wanbel i stap insait long marit!
Marit em i naispela samting stret. God i wokim marit na marit i olsem wanpela piksa bilong God Triwan (Papa, Pikinini na Holi Spirit). Long God Triwan yumi inap lukim dispela pasin bilong wanbel na bilong wok bung wantaim maski ol i stap olsem Papa, Pikinini, na Holi Spirit (Matyu 28:19). Olsem tasol, long marit yumi i lukim wankain samting: Man na meri (tupela manmeri) i pas na kamap wanpela (wanpela bodi) tasol. Dispela pasin wanbel bilong marit i olsem wanpela piksa bilong pasin wanbel bilong God Triwan long heven.
Na taim yumi klia long dispela samting, bai yumi klia tu olsem marit em i bikpela samting tru. Em i no samting nating. God i laikim tru dispela pasin bilong man na meri (tupela manmeri) i pas na kamap wanpela (wanpela bodi). Olsem na, God i bel nogut long pasin bilong brukim marit (Malakai 2:16), bilong wanem, pasin bilong brukim marit i brukim wanem samting God yet i pasim pinis: “God i tok olsem na tupela i no i stap olsem tupela moa. Nogat. Tupela i kamap olsem wanpela bodi tasol. Olsem na samting God i pasim pinis, em man i no ken katim” (Mak 10:8-9).
Tingim: God i save – na save bilong em i winim save bilong yu – wanem samting em i gutpela samting long marit bilong yu. Tingim: God yet i wokim marit! Olsem na Em i laikim tru marit!
Olsem na, sapos yumi harim Tok bilong Em na kisim save long plen bilong Em long marit bilong yumi, na sapos yumi i larim God i stap namel tru long marit bilong yumi, orait marit bilong yumi bai inap long stap olsem wanpela naispela na gutpela samting stret, na marit bilong yumi bai i stap strong inap long taim yumi i dai.
Dispela samting i kamap taim sin i kam long dispela graun
Taim Adam tupela Iv i pundaun long sin, sin i karamapim marit bilong tupela tu. Bihain long dispela, Baibel i putim ples klia olsem kain kain pasin nogut olsem belhat, kros, mangal, pasin bilong apim yumi yet, pasin bilong paitim narapela, na pasin pamuk i wok long bagarapim marit. Tasol dispela i no plen bilong God long marit. Plen bilong God i olsem marit i mas i stap holi na pulap long laikim tru.
Pasin bilong stap holi i winim pasin bilong stap amamas long marit. Sapos yu laik amamas tasol long marit, tasol yu no tingting tumas long stap holi long marit, orait bai yu no inap stap amamas longpela taim. Em bai drai hariap olsem wara i kamap long graun long moning i save go hariap na bai yumi i no inap lukim moa. God i laik yumi mas i stap holi long marit: pasin bilong daunim laik bilong yumi yet na laikim tru narapela, daunim yumi yet, pasin bilong bel isi, respektim narapela, stap redi long helpim narapela, na bel i pulap long lotu na prea.
Olsem na God i salim Pikinini bilong Em i kam long mekim marit i kamap nupela
God i no larim Adam tupela Iv na pikinini bilong ol (yumi olgeta) i stap long sin bilong ol. Na tu, God i no tok maski long plen bilong Em yet long marit.
Nogat! God i salim pikinini bilong Em i kam long kisim bek dispela graun i lus long sin na long mekim marit i kamap nupela gen. Taim Jisas i givim laip bilong Em long baim bek yumi, Em i brukim dispela strong bilong sin i wok long bagarapim marit bilong yumi. Nau, bikos long wok bilong Krais, marit i inap long kamap naispela tru gen!
Em i tru olsem God i lukim marit em i naispela samting tru. Olsem na, Nupela Testamen i tok olsem Jisas Em i olsem wanpela man i laik marit, na Sios bilong Em i olsem meri bilong Em (Efesus 5 na Kamapim Tok Hait 19).
Baibel i yusim dispela piksa bilong Jisas i laikim tru Sios bilong Em na i dai bilong kisim bek em long sin bilong soim yumi dispela plen bilong God long mekim marit bilong yumi i kamap nupela – Jisas i dai long yumi! Na meri i mas aninit long man bilong em, laikim em tru, respektim em, na mekim gutpela pasin long em, wankain olsem Sios i mekim long Jisas (Efesus 5:22).
Kain marit olsem bai i stap longpela taim tru. Kain marit olsem em i naispela samting stret long ai bilong God. Taim yumi pas wantaim Krais, yumi inap kisim kain marit olsem.
Olsem na, harim: no ken givim beksait long plen bilong God long marit bilong yu! Ritim na lainim planti samting long plen bilong God long marit bilong yu. Long Spirit bilong God, harim tok na bihainim plen bilong Em. Taim yu mekim olsem, bai yu klia moa olsem Jisas Em i man bilong kisim bek yu long sin, long ol samting nogut yu bin mekim bipo, na long ol promis yu yet i brukim. Em i tokim yu long lusim olgeta pasin nogut na bihainim Em! Olsem na, yumi mas lukluk i go long Jisas, Em i as bilong bilip bilong yumi, na bihain Em bai inapim tru bilip bilong yumi, laip bilong yumi, na marit bilong yumi tu.