Tru tumas, planti meri i save tok olsem, em i hat tru long painim wanpela gutpela  man long maritim. Sampela ol i tok, “Mi no inap marit bikos mi no painim wanpela gutpela man. Bai mi maritim husat?” Yes, i gat sampela meri i no bisi long ol dispela samting, tasol afta ol i marit i no longtaim na ol i painimaut man bilong ol i wanpela man nogut, na ol tu i kam bek long dispela askim: husat man em i gutpela man tru?

Olsem, long dispela artikel mi laik stori long ol meri husat i laik maritim wanpela gutpela, Kristen man. Yu yangpela man yu mas putim yau na harim gut dispela tok. O sapos yu marit pinis, skelim gut wokabaut bilong yu na putim yau tu long ol dispela kain tok. Tru tumas, yumi olgeta man i mas bekim ol dispela askim bilong ol meri.    

Man,

• Yu bilip long Krais na laikim Bikpela tumas na bai yu givim spiritual lidasip long mi na pikinini bilong mitupela?

• Bai yu lavim mi long gutpela taim na taim nogut? Maski mi no gat strong long mekim wok, o mi sik, o gat hevi long bebi na bodi bilong mi i go slek na skin bilong mi i go lus, bai yu lavim mi, yet?

• Bai yu luksave long nid bilong ol pikinini bilong mitupela na lukautim ol gut olsem wanpela gutpela papa?

• Bai yu stap faithful long mi inap long mi i trustim yu long olgeta samting?

• Planti man i save hait long ol meri tru bilong ol na faulim narapela meri i stap. Bai yu wankain olsem ol, o nogat?

• Bai yu tok nogat long ol poro bilong yu taim ol i laik grisim yu long dring na raun wantaim ol long nait?

• Bai yu sanap olsem wanpela gutpela man na mi ken tokim olgeta manmeri olsem “Man bilong mi em i wanpela gutpela man tru?”