TOK GIAMAN #3
Ol Gutpela Manmeri Bai Go Long Heaven
By Pastor Ian Wildeboer
Dispela tok, em i giaman tok, o nogat? Sapos pasin bilong yu i stretpela, bai yu go long heven, o nogat? Planti manmeri bilong kantri bilong yumi, na planti manmeri bilong olgeta narapela kantri tu, i ting olsem, sapos pasin bilong yu i stretpela, yu inap go long heven.
Tarangu, dispela tingting, em i kranki stret.
Sampela lain bai tok olsem, ‘God i save mekim gut long olgeta manmeri i mekim ol gutpela pasin, a?’
Nogat. Em i rong, tu!
O, sampela bai mekim toktok moa yet, ‘Sapos mi save mekim stretpela pasin olsem mi go long sios o ritim Baibel o beten o givim ol ofa, God bai i amamas long mi, a? Sapos mi i no save paitim meri bilong mi o tok nogut o spak, mi bai go long heven, a?’
Nogat. Em i rong na rong olgeta.
Ol manmeri i save mekim ol gutpela pasin na ol i ting dispela samting bai helpim ol i go long heven, ol i rong. Long wanem? Bikos Baibel i tok olsem, i no gat wanpela man i save mekim stretpela pasin. Nogat tru. I no gat wanpela man. (Rom 3:10-11). Tru, tru, ya. Sapos God i lukim wanpela gutpela man long dispela graun i save mekim ol stretpela pasin, orait, God bai i larim dispela man i go long heven. Tasol God i no inap lukim wanpela man i save mekim olsem.
Olsem na, bilong wanem ol pipel i save bilipim dispela giaman tok? I gat tupela as bilong dispela.
Namba wan as em i olsem: Ol i no save gut long sin em i wanem kain samting tru.
Ol i no save olsem, God Em i holi na holi olgeta. Yumi olegeta i pulap long sin. Bel bilong yumi i bagarap olgeta long sin. Tru, ya, taim yumi stap yet long bel bilong mama, yumi lain bilong mekim sin (Buk Song 51:5). Dispela lain i no save olsem i no gat wanpela man inap lukim long God na stap laip yet. Bilong wanem? Bikos holi bilong God i narapela kain olgeta (Kisim Bek 33:20). Ol i no save tu olsem lo bilong God i stretpela tru. I no gat wanpela man inap tru long bihanim ol lo bilong God long strong bilong ol yet. Olsem na, ol lo bilong God i no save kisim laip i kam long yumi. Nogat. Ol lo bilong God i save kisim dai tasol i kam long yumi.
Yumi ken lukluk long tok bilong Paul long Rom 7. Em i tok olsem, taim em i traim long mekim stretpela pasin, em i no inap. “Na pasin nogut mi no laik mekim, em mi save mekim.” Yumi no inap mekim ol gutpela pasin long kamap long heven, bikos yumi i pulap tru long sin.
Maski yu mekim sin olsem na yu mas i go long hel, God bai i kisim yu i go long heven!
Numba tu as em i olsem: Ol i no save gut long marimari bilong God.
Dispela, ya, em i marimari tru: Maski bel bilong yumi i pulap tru long sin, God i save laikim tru yumi na Em i opim pinis wanpela rot long kisim salvesen, na wanpela tasol long go long heven.
Olsem wanem? Long stretpela pasin tru na long dai bilong Jisas tasol!
Krais i ofaim Em yet bilong kisim bek yumi! “Krais i no bin mekim sin, tasol God i laik helpim yumi, olsem na Em i bin bungim olgeta sin bilong yumi antap long Em, na Krais i kamap olsem man bilong mekim sin tru. God i mekim olsem bai yumi ken i stap wantaim Krais, na long strong bilong Em yumi ken kamap stretpela manmeri bilong God” (2 Korin 5:21).
Jisas i lusim heven bilong kisim ples bilong yumi, bilong kisim pe bilong yumi, bilong kisim belhat bilong God, bilong rausim sin bilong yumi na bilong mekim olgeta pasin bilong yumi i kamap stretpela tru long ai bilong God.
Em i mekim olsem long diwai kros. Jisas i kisim ples bilong yumi na Em i karim pinis dispela kot na belhat bilong God. Na Em i givim bikpela blesing na amamas long yumi, na Em i givim yumi ol gutpela samting bilong laip bilong stap oltaim oltaim wantaim Papa God. Na ol amamas na ol gutpela samting bilong Em yet, dispela Em i bin givim long yumi.
Em, ya, em i marimari tru: Maski yu mekim sin olsem na yu mas i go long hel, God bai i kisim yu i go long heven!
Na em i marimari tru: God i save helpim yu bikos yu i no inap long helpim yu yet.
Na em i marimari tru: I no gat wanpela samting inap long pasim laik bilong Krais i kam long yu, na yu bai amamas wantaim Em oltaim oltaim long heven!
Olsem na, husat bai inap i go long heven?
Em i no hatwok tumas long bekim: Olgeta manmeri i no ting gutpela pasin bilong ol inap long helpim ol i go long heven, tasol ol i bilip tru long Jisas Krais tasol. Ol i bilip olsem Jisas tasol i helpim bilong ol long taim bilong laip na long taim bilong i dai. Jisas i tok olsem, “Na laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, Em yu bin salim i kam” (Jon 17:3). Yu save long Jisas?
Yu bilip tru long Em?
Sapos yumi i no save gut long ol dispela tok tru, yumi olgeta bai bagarap olgeta long bihain taim. Sapos yumi i no bilip long Jisas, yumi no inap painim bel isi long taim yumi stap laip na long taim bilong i dai.