Yumi long PNG, yumi wok long painim ol strongpela na gutpela lidaman.

Ol man tru tru!

Ol man husat i mekim gutpela na stretpela pasin olgeta taim—taim ol i raun long taun, taim ol i stap long haus o long ples wok!

Aposel Pol i bin tok olsem long ol Kristen long taun Korin, “Yupela i mas was gut na sanap strong long bilip. Yupela i mas i stap strong, na yupela i no ken pret long wanpela samting.” Na long tok Inglis, “Be on your guard, stand firm in the faith, act like men, be strong” (1 Korin 16:13).

Taim yumi stap olsem ol man tru tru, yumi lusim pinis ol pasin bilong ol pikinini. Ol pikinini bilong yumi, ol i save straik nating nating na kamap kros kwik na tingting long amamasim ol yet; tasol ol man i bikpela pinis na ol i mas tingting gut na pas wantaim Bikpela na bihainim stretpela pasin.

Taim Holi Spirit i tokim yumi man long kamap man tru tru, Em i tokim yumi long kamap strongpela man husat i no save guria na pret. Sapos yu man tru tru, bai yu bihainim ol stretpela pasin tasol—olgeta taim; bai yu holim strong bilip bilong yu na yu bai no inap surik; bai yu laikim tru Bikpela na ol wantok olsem yu laikim yu yet—i no sampela taim tasol—olgeta de. Ol dispela pasin i soim yumi wanpela tok piksa bilong wanpela trupela Man.

Ol kain man olsem, ol i luk olsem piksa bilong dispela wanpela trupela Man, Jisas. Jisas em i God na man wantaim. Jisas em i dispela man yumi olgeta i laik bihainim. Em i holi, na ol pasin bilong en i stretpela na gutpela olgeta. Taim Pailat i bin lukim Jisas, na blut i karamapim klos bilong En, na klostu em bai dai long diwai kros, Pailat i tokim ol Juda: “Lukim. Em hia dispela man.” Pailat i mekim tok i tru. Jisas em i dispela wanpela trupela Man.

Olgeta samting Jisas i bin mekim i soim yumi olsem Em i dispela man i winim ol narapela man. Yu laik kamap man tru tru, lukluk long En! Bihainim lek mak bilong En!

I no Isipela Wok

Yumi bai tok stret nau. I no isipela samting long kamap wanpela gutpela na stretpela man. Yu laik kisim pasin bilong ol pikinini, em isi stret. Tasol, wok bilong kamap man tru em i hat bikos yumi save larim sin i bosim yumi na planti samting long graun i pulim yumi.

Olsem na, yu no inap kamap wanpela gutpela man sapos yu lukim ol piksa nogut long mobile bilong yu. Na taim yu mekim olsem, yu no wanpela gutpela man, yu wanpela doti man stret.

O, yu no wanpela man tru tru bikos yu wok long giamanim bosman bilong yu long wok. Taim yu mekim olsem, yu no wanpela man tru tru, yu wanpela giaman man.

O, yu save paitim meri bilong yu na raun wantaim ol narapela meri tu. Sapos yu mekim olsem, yu no man, yu wanpela kain wel animal.

Sapos yu kisim fortnight bilong yu na yu no baim kaikai bilong haus. Nogat, yu baim beer na raun wantaim ol poro bilong yu, yu no inap kamap wanpela man tru tru, yu olsem wanpela longlong man.

Yes, em i hatwok olgeta long kamap olsem wanpela gutpela na stretpela man – olsem Krais.  Olsem na, yu no inap kamap olsem dispela kain man sapos yu stap longwe long Jisas Krais. Yu nidim marimari na strong bilong EM. Yu laik kamap olsem dispela kain man, yu nidim Krais, Em yet i trupela man. Yu mas tanim bel na pas wantaim Jisas tasol! Jon 15:5 i tok olsem, “Mi yet, mi diwai wain, na yupela i han bilong diwai wain. Man i pas long mi na mi pas long em, em i save karim planti kaikai. Sapos yupela i lusim mi, yupela i no inap mekim wanpela samting.”

Long dispela rot tasol, bai yumi i kamap olsem man tru tru. Jisas Krais tasol bai helpim yumi na inapim yumi!