ASKIM NA BEKIM:
Yumi gat rait long kilim wanpela man o meri sapos yumi saspek (suspect) olsem em i wokim sanguma na kilim wanpela lain i dai.
By Pastor Ian Wildeboer
Long helpim yumi bekim yumi mas i go long Buk bilong God na lo bilong kantri. Tru tumas, tupela wantaim i gat wanpela nek: Nogat, na nogat tru.
First, Buk Baibel i givim sampela skul long yumi olsem: i mas i gat tupela o tripela man i lukim wanpela i mekim rong olsem witnes bai ol i ken tokaut stret olsem dispela man o dispela meri i bin kilim em i dai. Lo 19:15 Na Moses i tok moa olsem, “Sapos wanpela man tasol i tok em i lukim narapela man i mekim rong na i autim dispela long kot, orait man bilong harim kot i no ken harim tok bilong dispela man. Namba bilong ol man i tok ol i bin lukim i mas olsem tupela o tripela, na bai ol i inap kotim em.
Tarangu, taim ol man o meri i kilim man bikos ol i ting em i wokim sanguma, ol i no inap kisim witnes.
Skelim gut kain stori olsem. Sampela lain i tok, mipela save, em i wokim sanguma long papa bilong mipela bikos mipela lukim wanpela blak bokis (o rat, dok, hornbill) i kam long haus bilong mipela taim papa bilong mi i dai. Na tu em i sanguma bilong wanpela meri, long wanem, dispela meri em i save jealous long papa bilong mipela, na sampela wik i go pinis ol i bin tok pait. Olsem na ol i tok: tru tru em i wokim sanguma long em. Askim i stap yet? Husat i witnes? Hau bai yu save tru tru em i dispela meri? Sampela bai bekim: ah, mipela i kisim glasman na em i mekim sampela wok wantaim mambu bilong em na em i makim dispela meri. Tasol glasman, poison man, mambu man ol i wokman bilong husat? Bikpela Jisas or Satan? Satan. Na Satan em i husat? Em i papa bilong giaman (Jon 8:44). Hau bai yu bihainim tok bilong ol wokman bilong Satan? Ol i lain bilong giaman. Long dispela as Buk Baibel i tok klia long Lo 18:10-11, “yupela i no ken larim ol manmeri bilong yupela i mekim olkain pasin bilong glasman, na pasin tambaran na pasin sanguma na wokim posin na mekim marila.” Long wanem, ol i lain bilong man nogut. Tok tru i no stap long ol.
Tru tumas, yumi mas harim gut tok Aposel Pol i bin mekim long ol lain long Efesus. Pol i tok long Efesus 6:12 “Tingim gut. Yumi no save pait long ol manmeri. Nogat. Yumi pait long ol strongpela spirit na ol gavman na ol kain kain samting i gat strong, ol i save bosim graun long dispela taim bilong tudak. Yumi pait long olgeta spirit nogut i stap antap.”
Tu, wok bilong kotim man o meri long rong ol i wokim em mas stap long han bilong lo na gavman. Dispela wok i no samting bilong wanwan man. Tingim gut, police ol i wokman bilong gavman na God yet i sanapim dispela gavman. Tru tumas, God i givim bainat long gavman long banisim na protektim ol manmeri long kantri. Romans 13:4 i tokaut klia long dispela: “Gavman em i wokman bilong God, bilong helpim yu na mekim yu i stap gut. Tasol sapos yu mekim pasin nogut, orait yu mas pret. Yu save, gavman i holim bainat, na em i no holim nating. Em i wokman bilong God, bilong bekim pe nogut long man i mekim pasin nogut.” Sapos man i ting wanpela lain i wokim sanguma long wantok bilong ol – ol i mas bihainim lo. Sapos nogat na ol i kilim dispela lain – ol yet mas sanap lon kot na kisim pe bilong rong bilong ol.
Tri, Gavman bilong PNG ol i bin rausim wanpela lo long dispela kantri ol i save kolim “sorcery act” (lo bilong sanguma). Long 1971 ol i wokim dispela lo bikos pasin sanguma, na poison, marila na kain pasin olsem em i bikpela tumas long PNG na ol i ting em gutpela yumi gat lo long kotim ol man i bin mekim dispela samting na bagarap man. Tasol long May 2013, Prime minister Peter O’Neil wantaim ol gavman lain bilong em ol i tok yumi mas rausim dispela lo – sorcery act – long wanem em i no pasim dispela pasin nogut bilong kilim ol lain husat ol i suspect olsem ol i wokim rong. Ol i tok olsem, long dispela 42 krismas i nogat wanpela ol i kotim aninit long dispela lo. Long wanem, ol i nogat evidens; ol i nogat trupela witnes. I min olsem, nogat manmeri i stap gutpela witnes na tokaut olsem em bin wokim sanguma o poison long em. I min olsem, taim ol lain long taun o long ples ol i laik kilim man o meri long wanem ol i bin wokim sanguma long wanpela bilong ol, ol yet ol i wokim murder. Ol i kilim man nating.
Fo. Planti taim manmeri i dai, ol lain i no painimaut as bilong dispela dai. Nogat. Ol i no kisim ripot long dokta. Planti kain sik i stap long bel bilong man na em inap long kilim em – TB, AIDS, Diabetes, Sik bilong liwa,bel (heart, liver, kidneys, lungs), Cancer, Heart Attacks, Stroke i go olsem. Tasol planti ol i lain i stap long pret na ol i ting – ol i wokim kurs long femili bilong mi. Sapos man i suspect long wanpela man o meri long wokim sanguma – pastaim em mas skelim gut wanem kain sik i stap wantaim ol.
Efesus 6:12 “Tingim gut. Yumi no save pait long ol manmeri. Nogat. Yumi pait long ol strongpela spirit na ol gavman na ol kain kain samting i gat strong, ol i save bosim graun long dispela taim bilong tudak. Yumi pait long olgeta spirit nogut i stap antap.”
Inap yumi toktok wantaim tewel bilong daiman? O, inap tewel bilong daiman poretim yumi?
NOGAT!
Tru tumas, planti lain i save tok yes long dispela. Wanpela mama em i sik na klostu em i laik i dai. Em i tokim pikinini bilong em olsem, “taim mi dai, tewel bilong mi bai was long yu na sapos sampela lain i mekim nogut long yu, bai mi mekim nogut long ol. Na em i dai. Pikinini bilong em i bilipim dispela tok na em i holim strong dispela giaman tingting.
Em i giaman tingting long wanem, God i no tok olsem. Buk Baibel i no tok olsem. Nogat. Saveman i tok olsem Eccl 12:7 “Bodi bilong yupela bai i kamap graun gen na spirit God i bin givim yupela bai i go bek long God.”
O tingim dai bilong dispela maniman na Lasarus long Luk 16. Taim ol i dai, wantu ol i go long ples God yet i makim. Maniman i go long hel. Lasarus i go stap wantaim Abraham long heven. Maniman i askim Abraham long salim Lasarus i go bek long tok save long ol lain long dispela ples hel paia. Ol i no inap go bek.
Tru tumas, taim yu dai, bodi bai kamap das, spirit o tewel bai go long ples God yet i makim. I min olsem ol i no inap toktok, poretim, helpim, bagarapim, mekim save o amamasim ol man bilong graun. Ol i go na go olgeta.
Olsem wanem na planti lain i ting olsem taim ol i harim nek bilong wanpela dai man o ol i lukim tewel bilong em ol i poret nogut tru. Olsem wanem? Dispela em i wok bilong man nogut, Satan. Ol dimons ol i wokman bilong em na ol i gat kain rot long poretim man – tok na kamap olsem tewel bilong man i no hat tumas long ol. Sapos yu bilip long Krais na yu harim o lukim kain tewel olsem yu ken tok olsem: “long nem bilong Jisas Krais yu go longwe long mi.” Ol bai go. Ol i poret long Krais!
Em i gutpela pasin sapos yumi sindaun na stori long ol stori bilong tambuna, o sanguma o magic o marila o poison o kain stori olsem?
I no gutpela pasin. Olgeta taim yumi toktok long sanguma, magik o marila o tambaran o kain samting olsem yumi save givim biknem long Satan! Husat man i laik givim biknem long dispela man nogut? Nogut yumi givim wanpela liklik hap glori long Satan – spirit bilong bagarapim man, kilim man na poretim man.
Tasol taim yumi toktok na pikinini i harim, ol i ting olgeta tok yu mekim em i tru na ol tu ol i save poret long ol samting bilong tudak, tasol ol i no save long strong bilong God na wok bilong Krais long pinisim strong bilong sanguma (Col 2:15; Efesus 1:20-21). Nogat. Ol i save tasol long ol pawa bilong tudak. Ol i stap long poret.
Skulim ol pikinini long tok bilong God, strong bilong God, marimari bilong God, wok bilong God insait long Krais na ol bai i no inap wokabaut wantaim pret!