EDITORIAL
Sanguma Tok o Tok bilong God…wanem TOK i gat ples long PNG?
By Pastor Ian Wildeboer
Yu harim dispela nem Kepari Leniata bipo? Sapos yu no klia long dispela nem, planti million, million manmeri long olgeta hap bilong graun i klia long dispela nem. Taim em i dai long Mount Hagen em i gat 20pela krismas tasol. Yangpela meri tru. Tasol long 06 February, 2013, taim ol manmeri i laik i go long wok, planti lain i paitim em nogut tru (torture), rausim olgeta klos bilong em na kukim em wantaim petrol. Em i dai long faia long rabis bung long Hagen. Em i krai. Em i singaut. Em i begim ol long stop, tasol ol i no harim. Ol i pasim yau na kukim em long ai bilong ol manmeri na pikinini. Nogat wanpela man o meri, bikman o bikmeri, pasta o tisa i helpim em. Planti i sanap na ol i lukluk tasol.
Sampela ol i poret olsem ol i lukluk. Planti ol i wanbel, em mas dai!
Dispela stori na planti kain stori olsem i raun long olgeta hap bilong PNG na sampela i brukim solwara na i kamap long Australia, Amerika, Europe na planti narapela hap. Planti million million manmeri i lukim meri i kuk long faia! Ol wari nogut tru, sampela i krai. Olsem wanem?
Ol i gat dispela askim: wai? Wai ol i mekim olsem? Wai i no kisim lo. Police we? Wai ol i no gat man i helpim em?
Bekim i olsem: sanguma tok i win!
Ol lain i kilim Kepari i tok olsem, dispela meri i wokim sanguma na em i kilim wanpela boy bilong mipela. Dispela boy i bungim pen long bel bilong em na em i dai long haus sik. Wantu sanguma tok i kamap. “Wanpela i wokim sanguma long em,” ol femili i tok. Na ol i kisim poison man o glasman na ol i wok long painim husat i wokim.
Yes, mi sori tru long dai bilong dispela pikinini. Dai bilong wanpela man, meri em i hat, dai bilong pikinini i hat moa. Tasol, olsem wanem long kilim Kepari? Sampela lain bai tok, Kepari em i gat dispela sanguma spirit, em mas dai. Husat i mekim dispela tok: God yet?! Nogat, taim ol man i statim sanguma tok na kisim glasman yau bilong ol i pinis olgeta long harim tok tru bilong Bikpela. Ol i no wetim Bikpela. Ol i no putim em long lo. Tasol maski, sapos em i wokim sanguma Romans 12:19 i tok wanem: “Ol pren tru bilong mi, yupela yet i no ken bekim rong ol i mekim long yupela. Yupela i mas larim God i belhat long ol. Yupela i save, buk bilong God i gat tok olsem, “Bekim rong, em i wok bilong mi. Mi yet bai mi bekim rong bilong ol na mekim save long ol.” Na Rom 13:4 i tok olsem “Gavman em i wokman bilong God, bilong helpim yu na mekim yu i stap gut. Tasol sapos yu mekim pasin nogut, orait yu mas pret. Yu save, gavman i holim bainat, na em i no holim nating. Em i wokman bilong God, bilong bekim pe nogut long man i mekim pasin nogut. “
Yupela i mas larim God i belhat long ol. Yupela i save, buk bilong God i gat tok olsem, “Bekim rong, em i wok bilong mi.
Tasol ol i no harim tok bilong God! Olsem na ol i no kisim police, yusim kot, na larim lo i mekim wok. Nogat. Tok tru bilong God i no gat ples insait long sanguma tok! Skelim gut.
Maski yumi singsing long National Anthem, “we give thanks to the good Lord above for his kindness and mercy and love…” long taim bilong dai, planti i no go painim God o wanpela pasto, nogat, ol i go painim glasman, poison man, mambu man long inapim wanem tok i stap insait long sanguma tok. I luk olsem Gutnuis i nogat ples long PNG long taim bilong dai! Tasol sapos Tok tru i no i stap, tok giaman bai kisim ples bilong em.
Insait long dispela magazine yumi bai skelim gut Tok Tru bilong God taim yumi bungim ol samting bilong dispela spirit world – sanguma, tewel bilong daiman, marila, mausalai; o ol wokman bilong Satan olsem glasman, poison man, komoman o meri, mambuman. Wanpela tok mas win! Wanpela tok mas lusim PNG. Wanpela tok, em i tok bilong laip, narapela em i tok bilong dai. Wanpela em i Tok Tru narapela em i tok giaman. Wanpela Tok em bilong God, narapela em i tok bilong man nogut – Satan. Long dai bilong Kepari Leniata, tok bilong dispela man nogut i win.
Husat i redi long harim Tok Tru, nau?!
Piksa: Kepari Leniata