Sorcery or Suicide – Sanguma o em i Kilim em yet. Trupela stori i kamap long Mekeo
By Anthony and Regina Aufa
Dispela em i story bilong wanpela yangpela man, krismas bilong en i 21. Em i bin skul long UPNG. Wanpela holidei dispela yangpela man i go long as ples tru bilong en. Na tu em i save go pas long pilaim musik long pati. Wanpela nait ol i go pati long wanpela ples i go inap tulait. Pati i pinis na ol i go bek gen long ples bilong ol yet.
Tasol em yet i no kambek. Olsem long dispela dei mama i wari stret na ol lain bilong em i wok long painim em. Bikpela wok painim em i bin kamap long ples na ol arapela ples tu, tasol ol i no lukim em.
Tulait i bruk na ol i painim bodi bilong em baksait long ples insait long wanpela wara. Wara i klia na i nogat planti gras bilong wara i stap long en. Tasol em i pas long ol gras bilong wara na i dai.
Pastaim ol man i painim shirt bilong em antap long wanpela kanu long ples bilong waswas. Tasol ol i painim bodi bilong em hapsait long wara. Ol i rausim em long wara na i nogat wanpela kelos i stap long bodi bilong em.
Bikpela stori i kamap long ples olsem: ol sampela lain i jealous long em bikos em i skul gut na bai em i wok na mekim sindaun bilong mama na ol lain bilong em i kamap gut. Olsem na ol i baim ol sanguma lain na ol i kilim em i dai.
Samting olsem tupela ten krismas i go pinis tasol dispela tottok i stap yet long bel bilong mama na ol lain bilong em. Tasol mi yet mi liklik brata bilong dispela yangpela man husait i bin dai pinis. Na mi luksave nau olsem dispela toktok em i no stret na mi no bilipim moa. Dispela taim mi wokim grade 3 bilong mi na mi bin lukim sampela kranki pasin brata bilong mi i save mekim. Em i save smukim mariwana na dring bia. Na taim mi askim em em i save tok: “Pasim maus, yu askim tumas!” Mi lukim papa na brata bilong mi i smuk na ol i no stap moa. Mi tu smuk tasol God i rausim mi long dispela pasin na mi tok tenkyu long Em.
Dai em i rot bilong olgeta man. Na tu God yet i makim dispela de bilong ol man na meri.
Yumi go bek gen long stori bilong yumi nau. Sampela krismas i go pinis mama bilong mipela i painim wanpela leta brata i bin raitim bilong poromeri bilong em tasol em i no salim i go. Dispela pas mama i painim insait long sut case bilong em. Liklik hap bilong dispela leta i tok olsem: “yu wokim bilong yu na nau bai mi wokim bilong mi na bai yu harim na lukim.”
Bikpela God tasol i save wanem samting stret i bin kamap. Tasol nau mi bilip olsem brata bilong mi i kilim em yet. Suicide! Tupela fren bilong em i mas i gat wanpela hevi na man yet i smuk na dring na i go draun long wara.
Yumi mas save, dai em i olsem aipas man i save painim rot na i save bam nating nating. Em i no save wari yu yangpela o strongpela o wanem. Psalms o Buksong 89:48 i tok olsem: “what man can live and not see death? “ “Husait man inap istap na bai em i no lukim o bungim dai (own translation)?” Na Ecclesiastes o Saveman 7:2 i tok olsem: “Death is the destiny of every man.” Dai em i rot bilong olgeta man (own translation).” Na tu God yet i makim dispela de bilong ol man na meri.
Tru tumas dai i save bungim man long kain kain rot. Tasol planti taim yumi sutim tok nating na mekim planti giaman toktok (olsem sanguma tok). Wanpela samting yumi mas skelim em i laip bilong man o meri i dai: wokabaut na sindaun bilong ol i olsem wanem? Nogut as bilong i dai bilong em i narapela samting.
Long pinisim stori mi laik tok olsem: yu kisim Jisas Krais orait yu kisim LAIP. Maski yu dai bai yu stap laip wantaim em oltaim. Na nau yu stap, yu no inap pret long dai. Bikos yu save taim yu dai yu lusim hevi na sin bilong graun na go na stap wantaim Jisas.