TOK GIAMAN #4a
Prosperity Gospel Em Bai Helpim Yumi
By Brata David van der Wal
Dispela em i tok giaman!
Ating wanpela taim yu bin raun long maket o taun na yu bin harim wanpela pastor i autim tok olsem, “God i wokim yu long piksa bilong Em yet olsem na yu olsem God yet” (Stat 1). Dispela prisa i tok moa olsem, “God i wokim yu bilong Em i ken amamas long yu” (Buk Song 139). Em i tok moa olsem, “Bikpela i laik mekim gut long yu, na Em i no laik mekim nogut long yu (Jeremaia 29:11), na sapos yu bilip tru long Em, ol dispela samting bai i kamap tru” (Mak 9:23).
Na bihain long dispela, em i skruim tok moa olsem, “Long Krais yu inap long mekim olgeta samting (Filipai 4:13), na yu bai stap gut tru bikos Jisas i karim bikpela pen na hevi bilong yumi pinis (Aisaia 53), na ol dispela samting bai kamap tru sapos yu bilip tru long God long bel bilong yu” (Rom 10: 9).
Oloman! Em i strongpela tok stret, a? Taim yu harim, yu mas laikim tru dispela tok na yu ting olsem laip bilong yu bai i senis olgeta. Bai yu no inap wari moa long kaikai o mani gen. Nogat tru! Taim yu go bek long haus, yu tingting planti long dispela autim tok na yu ting yu bai lukim dispela 50 kina bilong yu i gro kamap 5000 kina! Na dispela wanblut bilong yu i sik nogut tru, ating em bai i kisim orait bilong en sapos em i bilip na tok, “Mi orait pinis!”
Tasol wanem samting bai i kamap taim olgeta dispela samting i no kamap tru olsem dispela pastor i bin tok? Ating bai yu sori nogut tru na askim yu yet olsem, “Mi bin mekim wanem kranki samting na laip bilong mi i no kamap gutpela stret?”
Dispela 50 kina bilong yu i lus pinis, na famili bilong yu i hangre tru bikos yu no gat kaikai na yu no inap bekim dinau bilong yu. Na wanblut bilong yu i bin bilip na tok olsem em i orait pinis ya, turangu, em i stap yet long haus sik na i luk olsem dispela sik i winim em olgeta. Yu go bek long dispela pastor na askim em, “Bilong wanem dispela ol gutpela samting yu tok i no kamap long laip bilong mi?” Na em bai bekim askim bilong yu olsem, “Yu mas bilip strong na no ken kisim tupela tingting. Sapos yu bilip tru, bai yu kisim olgeta samting yu laikim.
Olsem tasol yu dinau gen long narapela 10 kina. Na yu go lukim wanblut bilong yu na yu tokim em gen olsem, God bai oraitim em. Moning gen yu no gat mani, na turangu, wanblut bilong yu i dai na bel bilong yu i hevi tru na yu krai i stap.
Bilong wanem God i no inapim tok bilong dispela pastor?
Bilip bilong yu no inap, o nogat? Em i asua bilong yu na dispela wanblut bilong yu i dai, o nogat? Em i asua bilong yu na dinau bilong yu i go antap moa yet, o nogat?
Dispela samting i no naispela, tasol em i save kamap long planti lain long kantri bilong yumi. Ol i save harim dispela kain tok – olsem ol bai i kisim planti mani, ol bai i stap orait, na ol bai i no inap sot long wanpela samting nau – tasol nogat, ol i wok long bungim hevi yet, ol krai yet na tingting bilong ol i paul.
Bilong wanem God i no inapim tok bilong dispela pastor?
Bikos em i tok giaman tru! Em i tok giaman olgeta! Dispela pastor i no save gut long Baibel!
Ol manmeri i bin harim tok giaman. Ol dispela kain pastor i giamanim ol lain long nem bilong Jisas. Ol dispela kain pastor i save promisim planti mani, gutpela helpim na amamas long ol. Tasol, nogat, mani bilong yu i lus, yu no kamap orait, na i olsem dispela ol pastor i stilim amamas bilong yu taim ol i kamapim tupela tingting na pret long tingting bilong yu. Ol dispela pastor i ting olsem ol i strongim yu long tok tru, tasol yu bai pret yet- nogut bilip bilong yu i no inap, na nogut olgeta samting i bagarap long pasin nogut bilong yu yet.
Na yumi ken sori tru bikos dispela em i no liklik samting. Em i olsem kaikai ol tising bilong Prosperity Gospel i save karim. Na i olsem ol i stilim mani na gutpela sindaun bilong ol lain bilong Papua New Guinea husat i bilipim dispela tok. Na wanpela samting moa em i dispela, Prosperity Gospel i save stilim bilip bilong ol tu na ol bai i paul yet na bai askim kain askim olsem, “I tru God Em i gutpela na olgeta Tok bilong En insait long Baibel i tru, o nogat? Sapos God i no save inapim ol promis bilong Em, hau bai mi bilipim dispela tok long Baibel?”
Pren bilong mi, harim: Tok bilong Baibel em i tru olgeta, na em i no save tok giaman.
God i no inap giamanim yumi!
Baibel i tok olsem, Satan em i papa bilong tok giaman. Ol dispela pastor bilong Prosperity Gospel i no save autim tok tru bilong God!
Olsem tasol, God i no promisim yumi gutpela sindaun na bikpela mani sapos yumi bihainim Jisas olsem Bikpela na Masta bilong yumi.
Ol i save paulim planti teks long Baibel na ol teks mi bin autim pastaim tu, bilong wanem, ol i no klia gut tru long as bilong ol dispela teks.
Kam nau, bai yumi lukluk long dispela ol teks gen, na bai yumi klia gut long as tru bilong ol dispela teks.
Stat 1 i tokim yumi olsem, God i wokim yumi kamap olsem Em yet bilong soim yumi olsem Em i pulap tru long strong na biknem. Em i no wokim yumi long piksa bilong Em yet bilong apim yumi yet. Nogat, yumi mas mekim ol gutpela pasin bilong God yet bilong soim strong na biknem bilong God long laip bilong yumi. O, tingting long Buk Song 139. Dispela Buk Song i no tok olsem yumi man i gutpela na bikpela olsem na God bai i amamas long yumi. Nogat, dispela Buk Song i laik soim klia olsem God i gutpela na antap tru na yumi mas litimapim nem bilong Em bikos Em i wokim yumi long save bilong Em.
Mak 9:23 i tokim yumi long bilip long Jisas bikos Em i God. Na Aisaia 53 i stori long Wokman bilong God o Savior bilong yumi bai i kam long God na kisim ples bilong yumi na karim pen na i dai. Na long wok bilong Em, God bai i lusim sin bilong yumi. Bikpela Jisas i inapim tru Aisaia 53. Dispela siapta i no tok olsem yumi bai i stap orait long bodi bilong yumi. Em i no tok olsem yumi bai stap gut olgeta taim long dispela graun. Nogat, bel bilong yumi bai i kamap orait – sapos yumi bilip long Jisas, yumi bai kisim wanpela nupela bel, em dispela nupela laip yumi kisim long Jisas.
Yumi lukluk tu long Rom 10:9. Dispela vers i tok, “Sapos yu tokaut klia long Jisas Em i Bikpela na sapos long bel bilong yu yu bilip long God i bin kirapim bek Em long matmat, orait bai God i kisim bek yu”. Em i no tok bai yumi kamap orait tru long bodi na bai yumi no inap bungim ol hevi gen. Nogat, em i samting bilong salvesen bilong yumi- wok God i mekim bilong Kisim Bek yumi.
Na las, bai yumi lukluk long Jeremaia 29. Vers 11 i tok olsem, “Mi Bikpela, mi tingtim pinis ol samting mi laik mekim bilong helpim yupela. Mi laik mekim gut long yupela. Mi no laik mekim nogut long yupela”. Dispela siapta long Jeremaia i stori long taim ol lain Juda bin i stap long kalabus long Babilon inap long 70 yia. Na Jeremaia i autim ol promis bilong God, olsem God bai i kisim ol i go bek long Israel (2 Stori 36:21-23), na tu, dispela teks i toktok long Krais husat bai i kam na inapim dispela promis olgeta. Em tasol i kisim bek yumi na Em i givim yumi dispela nupela laip bilong stap oltaim. Em tasol i redim wanpela ples long heven wantaim Papa God bilong olgeta manmeri i bilip tru long Em.
Olsem tasol, God i no promisim yumi gutpela sindaun na bikpela mani sapos yumi bihainim Jisas olsem Bikpela na Masta bilong yumi. Nogat, Em i promis olsem yumi bai bungim ol hevi na pen olsem Pol i tok long Filipai 1:29, “Harim, God i mekim gut pinis long yupela na Em i larim yupela i mekim wok bilong Krais. Em i no larim yupela i bilip tasol long Krais. Nogat. Em i larim yupela i karim pen tu long Nem bilong Em”. Na long siapta 4 lain 13 Pol i tok, “Krais i save strongim mi, na long stong bilong Em mi inap mekim olgeta samting”. I min olsem, Krais i save strongim mi long mekim wok bilong Em na long karim ol dispela pen yumi save karim long Nem bilong Em (Pol i bin stap long kalabus taim em raitim pas i go long Filipai).
Baibel i no mekim wanpela promis olsem wanblut bilong yu bai kamap orait sapos yu bilip tru long Em.
Em i no promisim yu olsem God bai givim planti mani na kago long yu sapos yu save givim planti samting long ol narapela lain.
Tok bilong God i no tok olsem yu inap mekim kain kain samting long laik bilong yu sapos yu gat strongpela bilip. Em i no tokim yumi olsem yumi gat pawa long mekim God i bihainim laik bilong yumi.
Nogat. Tasol Baibel i givim planti ol gutpela promis long yumi, na ol dispela promis i winim tru ol giaman promis dispela Prosperity Gospel i save mekim long yumi: Buk Baibel i promisim yumi olsem insait long Bikpela Krais Jisas bai yumi kisim laip bilong stap gut oltaim oltaim wantaim God Papa long heven. Na long dispela taim bai yumi inap long mekim olgeta samting God i laik yumi i mekim: Bai yumi presim Em na givim olgeta hona na glori i go long Em! Na tingim dispela: I no gat wanpela pastor bilong Prosperity Gospel inap long baim dispela promis long yu o helpim yu i baim dispela promis. Dispela promis em i wanpela presen God i givim nating tru long yumi, na yumi ken kisim long trupela bilip insait long Krais Jisas tasol!