TOK GIAMAN #1
Yumi Mas Pret Long Ol Sanguma Na Poison
By Pastor Nawai Renagi and Pastor Ian Wildeboer
Em nogat tru. Em i giaman tok tasol: yumi no ken pret long ol samting bilong tudak.
Sapos yu save olsem yu pikinini bilong God, bilong wanem yu pret long ol sanguma, poisin, marila o puri puri. Yu no lukim long ai bilong yu wanpela man i senisim man i kamap dok.
No gat wanpela!
Dispela em i tru bikos:
Ol dispela kain tok o nem, ol i no gat as bilong ol. Ol manmeri bilong dispela graun, ol yet i bin kamapim ol dispela tok. Ol i laik kisim save long ol samting bilong ol spirit nogut, na tu, ol i laik pretim ol manmeri. Ol save tokaut long ol dispela samting wantaim ol famili lain bilong ol; ol save lainim ol pikinini long dispela samting; na ol arapela lain i kamap bihain, ol tu bai harim dispela tok. Long wanem, dispela pasin i no pinis yet. Yu mas save olsem ol dispela tok i tok win tasol; bikos long wanpela pait i bin kamap namel long God na Satan.
Tasol, God bilong yumi Em i Bikpela na King bilong heven na graun, na Em i save bosim olgeta samting wantaim pasin laikim na ol trupela pasin. Planti tausen tausen ensel i save aninit long Em na bihainim tok bilong Em olgeta taim.
Tingim.
Satan em i wanpela ensel tu, tasol em i no bin daunim em yet aninit long God olsem na God i bin tromoim em i go daun long graun, wantaim ol ensel husait i laik bihainim Satan (Kamapim Tok Hait 12). Satan em i stap yet olsem wanpela ensel nogut. Em i stap bikman antap long ol spirit nogut na ol manmeri i stap long tudak na save mekim sanguma o poisin. Satan em i papa bilong ol tok giaman na em i man bilong kilim ol man i dai long bipo yet (Jon 8:44). Tasol em i wanpela ensel tasol.
Na yumi no ken lus tingting long dispela: God i stap antap moa long Satan.
Satan i no inap i stap long olgeta hap bilong graun long wanpela taim olsem God inap! Satan i no save long olgeta samting olsem God i save. Olgeta pawa bilong Satan, God i bin givim long en. Em i min olsem: Satan mas bihainim tok bilong God. Tingim dispela gutpela man tru, nem bilong en, Jop. Satan bin askim God long tok orait long Satan i ken bagarapim Jop. Na God i bin tokim em, “Yu ken mekim wanem samting yu laik mekim long en, tasol yu no ken kilim em i dai” (Jop 2:6). God bai inapim plen bilong En, maski wanem samting Satan i mekim (Stat 50:20).
Tasol, God bilong yumi Em i Bikpela na King bilong heven na graun, na Em i save bosim olgeta samting wantaim pasin laikim na ol trupela pasin.
God na Satan i wok long pait yet, na Jisas i bin kam. Jisas i bin stap taim olgeta samting i no kamap yet, na Em i save mekim olgeta samting i stap gut na i wok gut wantaim (Kolosi 1:17).
No ken lus tingting: Jisas Em i dispela King i bin brukim olgeta pawa bilong Satan na ol spirit nogut, taim Em i bin dai long kros bilong Kalvari (Kolosi 1:15).
Nau Em i King bilong heven na graun, na Em i bosim olgeta samting—Satan na ol spirit nogut wantaim. Yes, Satan em i gat liklik strong—1 Pita 5:8 i tok, em i olsem wanpela laion i singaut strong na em i save raun bilong painim ol manmeri bilong kaikai. Tasol, God i save bosim olgeta pawa bilong Satan. Wanem samting em i laik mekim, God i mas tok orait pastaim.
Yes, Satan em i papa bilong giaman, tasol Jisas i tok, mi as bilong tok tru (Jon 14:6). Yes, Satan gat laik long pretim ol manmeri, tasol bai yumi pret long husait taim God i stap wantaim yumi? Yes, Satan em i olsem wanpela stilman i kam bilong kilim ol sipsip i dai na bagarapim ol, tasol Jisas i tok, “Mi kam bilong ol i ken kisim laip, na bilong laip i ken pulap tru long ol” (Jon 10:10). Yes, Satan i bin giamanim yumi long PNG longpela taim tumas, tasol Jisas bin kam pinis long mekim yumi i stap fri!!
Dispela trupela tok i soim yumi olsem i gat wanpela King bilong olgeta King, Em i Jisas.
Olsem na, taim wanpela man o meri i bilip long ol sanguma o pawa bilong puri-puri, marila, o poisin, ol i bilip long pawa bilong tudak bilong Satan. Ol dispela samting i kam long en. Na sapos ol i mekim sanguma na ol i no tanim bel, God bai kotim ol. Taim Jisas i kam bek, ol bai go long ples bilong ol, dispela bikpela hul i gat hatpela paia i lait long ol ston salfa (Kamapim Tok Hait 21:8). God i les tru long ol pasin bilong Satan na tudak!
Olsem na, yumi no ken pret long Satan, yumi mas pret long God! Sapos God i save bosim ol tudak, yumi mas beten long En na trustim En tasol. Harim toktok bilong Em i bosim yumi na i no toktok bilong Satan. God i save mekim olgeta samting i kamap, long laik bilong En yet. Na sapos yumi givim bel bilong yumi long God, Em i promis pinis long mekim olgeta samting i wok wantaim bilong mekim gut long yumi (Rom 8:28).
Yumi no ken wari na pret long sanguma, poisin, marila, o ol dispela kain samting bilong tudak! Nogat, brata o sista, yu gat nid long lukluk long Krais na tokaut olsem Em i Bikpela long laip bilong yu. Yu mas bilipim tok bilong Em. Taim Em i tok, ‘mi save long yu, mi laikim yu, mi bin kisim bek yu, yu bilong mi, na mi bai no inap lusim yu!’ Yu ken tokaut olsem: em nau! Em tru! Nau mi save.
Sapos yu pilim olsem yu stap aninit long pawa bilong sanguma, yu no ken pret. Tingim Satan i olsem wanpela laion, na em i laik bagarapim yumi olgeta. Tasol yumi mas bilipim dispela promis insait long tok bilong God olsem, “Dispela Spirit i stap insait long yupela em i winim spirit i stap insait long ol man bilong graun” (1 Jon 4:4). Kisim strong long Bikpela.
Sapos yu bin harim olsem wanpela man i wokim sanguma na bihain yu ting olsem wantok bilong yu i dai long dispela as. Tingting gut pastaim. No ken sutim tok nating na traim long bekim bek. Askim ol dokta long sekim bodi na painimaut wanem samting bin kilim em i dai. Na tu, yumi lainim pinis, i no sanguma i save kilim ol man. Em i toktok tasol. God yet i makim de bilong dai bilong ol man na meri, maski em i larim Satan i pinisim laip bilong wanpela lain. I no sanguma. Em I God, yet!
Olsem na, olgeta ansa bilong olgeta askim i stap long Jisas Krais.
Lukluk long Em.
Krais i save mekim yumi i win tru (Rom 8:37). Yumi no ken surik. Yumi mas i stap strong. Yumi no ken pret.