Sapos yu bin bilipim tok bilong narapela na bihainim em, tasol bihain yu harim olsem em i giamanim yu – yu save pilim olsem wanem?

Sapos tok giaman bilong em i samting bilong mani, planti mani? Sapos wanpela papa lain i promis long givim yu mani sapos yu givim sampela mani long helpim wok bilong kisim bikpela mani, na yu mekim olsem? Na sapos, sampela taim bihain, em kam bek gen, na askim yu long sampela moa mani, na mekim wainkain promis olsem bipo, na yu givim long em? Dispela samting i go i go, tasol yu no lukim dispela mani yet. Maski westim taim–bai yu dai olsem wanpela rabisman tru.

O, sapos tok giaman bilong wanpela em i samting bilong laip? Dokta i tokim yu olsem pikinini meri bilong yu bai stap orait, tasol sampela de bihain em i dai. Dispela dokta bin giamanim yu bikos em i les long helpim pikinini meri bilong yu, em i no inap, o em i bisi tumas, tasol yu bin bilipim em taim em i tok pikinini bilong yu bai kamap orait. Tasol, nau bai yu mekim wanem? Wanem kain piling bai kisim yu?

Ol tok giaman em i samting nogut tru i bin kamap long graun taim Adam na Iv i bin bilipim ol tok giaman bilong Satan. Tupela i no bin bilipim ol tok promis bilong God. Na tok giaman em i samting nogut tru i stap yet long PNG.

Yumi save:

Tok giaman save kamap long Parliament Haus bilong yumi.

Tok giaman save kamap long ol maket bilong yumi.

Tok giaman save kamap long ol ples wok bilong yumi. Ol haus bilong yumi yet i pulap long tok giaman.

Tok giaman i stap insait long bel bilong yumi wanwan. Na kantri bilong yumi i kamap olsem wanpela bikpela hap long dispela graun bilong tok giaman na paulim mani samting.

Tasol, yumi go daun moa insait long dispela tok.

Sapos ol dispela tok giaman em i samting bilong spirit bilong yumi. Sapos dispela tok giaman bai pasim yu long stap gut wantaim Bikpela oltaim oltaim. Sapos ol narapela i no lainim yu gut na yu no klia tru tru long ol tok bilong Gutnius. Sapos ol pasto o sios lida bilong yu, ol i autim tok giaman, na ol dispela tok i no inap bringim yu klostu moa long Krais, nogat, em bai bringim yu long hel. Sapos ol i wok long giamanim yu, tasol yu no save long dispela?

Nambawan presen God i bin givim long yumi, em i TOK TRU! Na Tok Tru i bin kamap man na i stap long dispela graun. Tok Tru em i Jisas. “Mi yet mi rot, na mi as bilong tok tru, na mi as bilong laip,” Jisas bin tok olsem long Jon 14:6.

Na dispela em i Gutnius: Jisas Em i tok tru, na Em i bin winim papa bilong tok giaman, Satan, long diwai kros tu. Taim Em i bin tok, “em i pinis nau”, Em bin winim tru Satan, olsem na tok tru inap kamap na igo antap gen!

Olsem ol Kristen manmeri, yumi laikim tumas tok tru bikos yumi laikim tru Jisas. Yumi les tru long ol tok giaman bikos yumi les na les olgeta long dispela papa bilong tok giaman. Tasol, “Sapos yupela i holim strong tok bilong mi, orait yupela bai i stap ol disaipel tru bilong mi. Na yupela bai i save long tok tru, na tok tru bai i mekim yupela i kamap fri,” Jisas i tok olsem (Jon 8:31,32).

Olsem na mipela i bin raitim dispela magasin, Tulait, bikos mipela i laik yupela, ol manmeri bilong ritim dispela magasin, i save long tok tru. Na mipela i laik yupela i stap fri, na fri olgeta! Nogut yupela i stap long kalabus bilong ol tok giaman, em i kalabus bilong man nogut.

Long helpim yupela, mipela bin putim ples klia 7-pela tok giaman i wok long bagarapim tru yupela, ol gutpela manmeri long PNG.

I gat planti tok giaman tru i stap, tasol mipela i bin makim ol dispela 7-pela olsem ol bikpela tok giaman tru i wok long bagarapim ol manmeri, yangpela na ol pikinini bilong yumi.