PNG em i nambawan kantri bilong lukim Piksa Nogut
By Pastor Ian Wildeboer
Google i tok olsem, PNG em i nambawan kantri bilong lukim pornography (ol piksa nogut) long Internet. Em ol pamuk piksa bilong man na meri i wokim pasin marit. Google i kamap klia long dispela bikos ol i kaunim hamaspela taim ol lain long PNG i save taipim dispela tok “porn” o “pornography” long Google long lukim pamuk piksa o piksa nogut long Internet. Na namba bilong dispela i winim ol narapela kantri. Tru, PNG i winim olgeta narapela kantri long lukim piksa nogut o pornography! Zimbabwe, Kenya na Botswana i gat planti manmeri tu i save lukim pornography tasol ol i bihainim PNG liklik. ABC nius long Australia i tokaut long wanem dispela i kamap long PNG. Ol i tok olsem: ‘i gat planti Kristen long PNG, tasol ol i save tingting long bihainim ol lo tasol, na Tok bilong God i no stap tru long bel bilong ol man.’ Mi no save sapos dispela i tru o nogat, tasol mi save long dispela, sapos yu lukim porn o piksa nogut, hau bai yu tok olsem yu wanpela Kristen? Sapos yu lukim piksa nogut bai yu karim sem na bai yu wokabaut long ples tudak. Em bai bagarapim tingting bilong yu, na em bai bagarapim marit bilong yu tu (maski yu no marit yet – em bai bagarapim marit bilong yu long bihain). Em bai bagarapim sindaun bilong yu na wokabaut bilong yu.
Na mi klia, ol lain long ol narapela kantri olsem America, o Australia, o Canada, ol tu i save lukim planti porn o piksa nogut, tasol ol i save gut tru long planti narapela rot long lukim piksa nogut. Na mi wari tru olsem planti lain i tok olsem “Mi Kristen” tasol ol tu i save lukim piksa nogut yet. I gat wanpela lain long America (ol i kolim Barna Group) i mekim wok long painimaut planti samting, na ol i kisim save olsem 77% bilong ol Kristen man (na sampela meri tu) long America i gat 18 krismas i go antap long 30 krismas, i save lukim piksa nogut o pornography long olgeta mun. Na 77% long ol man i gat 31 krismas i go antap long 49 krismas i save lukim pamuk piksa o piksa nogut insait long tripela tripela mun, na 20% samting i bagarap long porn. I min olsem ol i no inap lusim dispela pasin long painim amamas long lukim piksa nogut o pamuk piksa. Ating sapos yu lukim dispela long olgeta wik, o mun, o insait long tripela tripela mun, orait dispela ol pamuk piksa i winim yu na bosim yu. Tasol em klia, na i gat planti stori i putim ples klia olsem, dispela sin bilong lukim pamuk piksa o pornography i save kamapim bikpela pen na hevi insait long marit olsem pasin bilong bagarapim meri, rape, na pasin pamuk. Ol dispela bai brukim marit na pasin bilong pas tru wantaim God!
Orait, sapos yumi tok olsem, “Na yumi manmeri i pas wantaim Krais Jisas, lo i no inap kotim yumi moa” (Rom 8:1). O, sapos yumi tok, “Mi wanpela sinman, tasol marimari i kisim bek mi.” Sapos yumi tok olsem, tasol yumi wok long lukim piksa nogut long amamasim skin bilong yumi, orait ol dispela tok i samting nating. Yumi NO i stap klin long ai bilong God. Nogut yumi stap AUSAIT long laik bilong Krais long dispela sin. Nogut yumi stap long dispela rot i go inap long yumi bungim dai na go long hel paia.
Rom 8:8-9 i tok, “Ol man i wokabaut long pasin bilong olpela bel, dispela ol man i no inap long mekim pasin God i laikim. Tasol yupela i no wokabaut moa long pasin bilong olpela bel. Nogat. Sapos i tru Spirit bilong God i stap long yupela, orait nau yupela i save wokabaut long pasin bilong Holi Spirit. Na man i no gat Spirit bilong Krais, em i no man bilong Krais.”
Wankain long olgeta sin, taim yu larim sin bilong lukim piksa nogut i kam insait long laip bilong yu i olsem yu bringim dai i kam insait long laip bilong yu tu! Long ai bilong God em i pasin nogut stret. “Sapos tingting bilong man i bihainim laik bilong olpela bel, dispela man i save birua long God, long wanem, em i no save stap aninit long lo bilong God. Em i no inap tru long bihainim lo bilong God” (Rom 8:7). Dispela teks i putim ples klia – yu no inap lukim piksa nogut na mekim ol narapela wankain pasin olsem na stap wanbel wantaim God. Nogat tru. Yu no inap wok long larim sin bilong pamuk i stap insait long tingting bilong yu, o lukim ol piksa nogut long ol buk o magasin na stap wanbel wantaim Bikpela. Nogat tru. Na tu, bai yu kamapim ol hevi na kros long famili bilong yu tu. Mi tok tru, mi yet mi save long planti famili i bagarap long dispela pasin. Tru tumas yu no inap lukim piksa nogut na stap wanbel wantaim man o meri bilong yu, o famili bilong yu, o poro bilong yu, o wantaim ol narapela manmeri tu. Yu no inap. Pamuk piksa i save wok long grisim yu, na kisim yu i kam, na bihain em bai holimpasim yu na bagarapim yu.
Rom 8:8-9 i tok, “Ol man i wokabaut long pasin bilong olpela bel, dispela ol man i no inap long mekim pasin God i laikim. Tasol yupela i no wokabaut moa long pasin bilong olpela bel. Nogat. Sapos i tru Spirit bilong God i stap long yupela, orait nau yupela i save wokabaut long pasin bilong Holi Spirit.”
Hop i stap? Yes! ABC news na Google i inap daunim PNG long pasin nogut bilong en, na dispela Barna group i inap putim ples klia ol sin bilong planti tausen man na sampela meri tu. TASOL Buk Baibel i tok olsem yumi inap kamap wanbel wantaim Bikpela gen bikos Krais i dai. Lukluk long Krais tasol. (Lionel, have the two sections here – before and after this comment – highlight separately when you quote these) Marimari i stap bilong ol sinman na sinmeri, wankain olsem yu na mi, sapos yumi autim ol sin bilong yumi, tanim bel, na beten long marimari bilong God. “ Olsem na yumi manmeri i pas wantaim Krais Jisas, lo i no inap kotim yumi moa” (Rom 8:1). Taim yu bilip long Krais, i min olsem Spirit bilong em bai i wok long senisim laip bilong yu. “Olsem na sapos wanpela man i pas wantaim Krais, orait God i mekim em i kamap nupela man tru. Harim gut. Nau olpela pasin i pinis olgeta, na nupela pasin i kamap pinis” (2 Korin 5:17). Ol lain bilong Krais i no wok long amamasim bodi bilong ol yet; nogat, ol i wok long amamasim God. “Ol man i save wokabaut long pasin bilong olpela bel, tingting bilong ol i save bihainim laik bilong olpela bel tasol. Tasol ol man i save wokabaut long pasin bilong Holi Spirit, tingting bilong ol i save bihainim laik bilong Holi Spirit” (Rom 8:5).
Buk Baibel i tokim yumi long pait. Yumi mas pait! Yumi mas paitim strong laik nogut bilong bodi bilong yumi, na daunim sin na larim stretpela pasin bilong Krais i stiaim bel bilong yumi long bihianim Em (lukim 1 Korin 9:27). Yumi mas pasim ol klos pait na mekim pait. Pastor John Piper i bin tok, “No ken komplen long sin bilong yu; nogat, pait long ol sin tasol.” Long dispela pait yumi mas yusim olgeta samting bilong pait bilong heven wankain olsem Pol i stori long en long Efesus 6: 14-17, “ Sapos yupela i laik sanap strong, orait yupela i mas pasim tok tru olsem let bilong yupela, na pasim stretpela pasin olsem siot kapa i karamapim bros bilong yupela, na yupela i mas redi long autim gutnius bilong God i laik wanbel wantaim ol manmeri, na putim dispela pasin olsem su bilong yupela. Yupela i mas kisim dispela olgeta samting bilong pait, na yupela i mas kisim tu pasin bilong bilip, na holim strong olsem hap plang, bai yupela inap long mekim i dai olgeta spia paia dispela man nogut Satan i save sutim i kam long yupela. Yupela i mas tingting long God i kisim bek yupela pinis, na dispela tingting i mas i stap olsem hat kapa yupela i putim. Na yupela i mas holim bainat bilong Holi Spirit, em tok bilong God.”
Pait, na pait strong! Painim sampela poro bilong helpim yu, askim wanpela pastor o hetman bilong sios long helpim yu, na tok tru long ol. Download sampela gutpela apps/programs long internet long pasim yu long go long ol websites nogut. Olgeta de askim God long helpim yu i mekim olsem. Na no ken les long mekim olsem long olgeta de.
Yumi stap long wanpela kantri we ol pait i save kamap hariap; na planti ol dispela pait i samting bilong payback na ol i no gutpela pait. Tasol mi promisim yu dispela: Dispela pait long pasin bilong lukim ol pamuk piksa o piksa nogut em i gutpela pait tru, na em bai helpim yu tru! Na sapos yu winim dispela pait long wan wan de long strong bilong Holi Spirit, marimari bilong God bai givim yu bikpela bel isi stret, na bel na tingting bilong yu bai kamap klia tru. Dispela gutnius bilong marimari na tok tru i ken go aut long dispela kantri PNG na long arapela kantri long dispela graun wei man i save pundaun long dispela sin bilong lukim piksa nogut. Sapos ol man i les long paitim dispela sin ol i mas putim yau gut long tok bilong God “Bikpela hevi na pen bai i kamap long olgeta man i save mekim pasin nogut” (Rom 2:9). Olsem mi strongim yu nau: long strong bilong Krais yu mas ranawe tru long dispela sin na ran long Krais – King na Savior bilong yu!