Ol save lain i gat gutpela save long helt bilong yumi, i tok klia olsem: Buai em i no no gutpela long bodi bilong yumi. Dispela em i wanpela tok:

“Sapos yu save kaikaim planti buai, orait ol dispela samting nogut i inap kamap:

• Tit na gam bilong yu bai i kamap retpela na braunpela
• Ol sua long maus bilong yu. Gam bilong yu bai kisim sik tu.
• Ol sik kensa long maus bilong yu o submucous fibrosis (wanpela sik i save kamap bipo long taim yu kisim sik kensa)
• Ol sua insait long bel bilong yu
• Sik long lewa bilong yu
• Em bai kamap olsem wanpela adiksen bilong yu
• Bai yu bungim ol hevi long mani, wok, na sindaun bilong yu tu.”^[1]

Narapela i mekim dispela tok:

“Ol lain i glasim gut dispela pasin bilong kaikaim buai, ol i lukim olsem i gat planti ol sik na hevi i save kamap long bodi bilong man na meri i save kaikai planti buai. WHO i tok olsem buai em i wanpela samting i save kamapim sik kensa long bodi. Planti ol save lain i luksave olsem pasin bilong kaikai buai i save kamapim kensa long maus na nek bilong man. Na wanpela stadi i kamap long ‘Journal of the American Dental Association,’ na i tok olsem planti lain i save kaikai buai bai i kisim wanpela sik ol i kolim ‘Submucous Fibrosis’ long maus. Dispela em i wanpela sik i nogat marasin bilong em, na em bai i pasim maus bilong yu na mekim olsem yu hat long opim maus bilong yu. Na sapos yu kaikai buai planti taim, em bai bagarapim gam na tit bilong yu. Na tit bilong yu bai kamap retpela o blakpela tu.

Wanpela stadi i bin kamap long ‘American Society for Clinical Nutrition,’ i luksave olsem planti ol lain i save kaikai buai bai kisim ‘cardiovascular disease’ (sik bilong lewa), ‘metabolic syndrome’ (narapela sik bilong lewa na blut), na ‘obesity,’ (taim yu patpela tumas).

Na tu, buai inap long bagarapim ol arapela marasin yu kisim. Sapos yu kaikai buai taim yu daunim marasin wantaim, em inap long kamap olsem poisen long bodi bilong yu. Sampela taim buai bai bagarapim dispela marasin na em bai i no inap wok gut. Ol i mas kisim sampela moa save yet long hau buai i save wok wantaim ol kain kain marasin. Sapos yu save kaikai buai, em inap kamap olsem wanpela adiksen na em bai i no isi long stopim.”^[2]

Na wanpela moa:

“Ol meri i gat bel o mama i save givim susu long bebi bilong ol, bai inap long kisim planti moa hevi sapos ol i kaikai buai. Buai inap long afektim dispela ‘central nervous system’ (dispela samting i wok long kontrolim olgeta samting bilong bodi bilong yumi) na dispela inap long bagarapim bebi i stap long bel. Ol kemikal insait long buai i ken i go insait long susu bilong dispela mama na mekim nogut long bebi bilong em taim bebi i kisim susu long mama bilong em. Olsem na, sapos yu gat bel o givim susu long bebi bilong yu, no ken kaikai buai.”^[3]

^[1] Alcohol and Drug Foundation: adf.org.au/drug-facts/betel-nut. Kisim long 12 Mars, 2020.

^[2] “How Dangerous is Betel Nut,” https://www.healthline.com/health/betel-nut-dangers. Kisim long 12 Mars, 2020.

^[3] “Betel Nut,” https://www.webmd.com/vitamins/ai/ingredientmono-995/betel-nut. Accessed 12 Mars, 2020.