Brukim Strong bilong ol Adiksen
Pasto Cornelis Kleyn
Bill em i gat 60 krismas na em i dring planti bia na westim planti mani long pilai laki. Dispela sin i kalabusim em, i olsem em i adikted long dispela sin, na em i yusim olgeta mani bilong em long dispela adiksen. Em i save askim meri bilong em long givim mani long em. Meri bilong em i les long givim mani long em, nogut em i westim dispela mani, olsem na em i save tokim em, “Mi gat mani, tasol mi no inap givim long yu – nogut yu westim dispela mani long ol adiksen bilong yu.” Tasol bihain, man i save krosim em nogut tru, olsem na meri bilong em i wok long giamanim em na tok, “Nogat, mi no gat mani!”
Kain pasin olsem i wok long kamap planti taim, na famili bilong em i gat laik long dispela pasin i mas pinis. Ol i les long dispela pasin bilong giaman, tok kros, na westim mani. Tasol ol i inap mekim wanem? Olsem wanem bai Bill inap long brukim strong bilong adiksen bilong em?
Dispela em i gutpela askim stret taim yumi lukim wanpela man o meri i stap insait long kalabus bilong wanpela adiksen, maski em i adiksen long bia, ol drak olsem mariwana, buai, or maski em i adiksen long piksa nogut, pilai laki, wok olgeta taim, o lukluk long fon tumas. Hau bai yumi inap long brukim dispela ol adiksen i wok long kalabusim yumi, na hau bai yumi i senisim laip bilong yumi?
Sori Tru long Sin
Sapos yu laik brukim strong bilong ol adiksen, pastaim yu mas klia olsem dispela pasin i rong. Yumi mas klia olsem ol dispela adiksen i wok long bagarapim laip bilong yumi, na famili bilong yumi, na komuniti bilong yumi, na tu em i bagarapim wokabaut bilong yumi wantaim Bikpela, na dispela em i bikpela samting tru. Na taim yumi klia long dispela, orait nau bai yumi inap long mekim sampela senis i kamap. Pastaim yumi mas klia long rong bilong yumi na yumi mas tok sori. Yumi mas tok sori long God na long ol lain yumi i bin bagarapim tu.
Kisim Helpim
Tasol sampela taim, maski yumi sori tru, stil bai yumi no inap brukim dispela adiksen. Na yumi nidim ol arapela long helpim yumi. Em i gutpela long yumi i kisim dispela kain ol helpim:
- Go lukim wanpela dokta
- Go sindaun wantaim pasto bilong yu
- Askim femili na ol pren bilong yu long helpim yu
- Askim ol lain long sios long helpim yu
- Beten
- Toktok wantaim wanpela Kaunsila (Counselor)
- Joinim wanpela bung bilong ol lain i wok long brukim ol adiksen (kain olsem Alcoholics Anonymous – AA)
Na nambawan samting tru, yumi mas klia long tok bilong profet Jeremaia, “Bel bilong olgeta man i save tingting oltaim long mekim pasin giaman. Tingting bilong man em i nogut tru. Na husat inap save long as tru bilong en?” (Jeremaia 17:9). Yumi i nidim helpim bilong Bikpela long brukim strong bilong ol adiksen.
Nambawan samting tru, yumi mas klia long tok bilong profet Jeremaia, “Bel bilong olgeta man i save tingting oltaim long mekim pasin giaman. Tingting bilong man em i nogut tru. Na husat inap save long as tru bilong en?” (Jeremaia 17:9). Yumi i nidim helpim bilong Bikpela long brukim strong bilong ol adiksen.
Senisim Laip bilong Yu
Taim yumi i wok long rausim ol adiksen long laip bilong yumi, orait yumi mas painim sampela samting long kisim ples bilong dispela adiksen. Yumi mas rausim “dispela olpela pasin… em pasin bilong giaman na bel i kirap long mekim ol samting nogut.” Tasol moa, “tingting bilong yumi i mas kamap nupela”, na yumi i mas “kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru” (Efesus 4:22-24).
Taim ol adiksen bilong yumi i wok long pulim yumi insait long dispela pasin, orait yumi mas lainim pasin bilong tok, “Nogat!”. Na wantu yumi mas mekim sampela gutpela pasin. Sampela lain i save pulim smok, ol i tok olsem i gutpela long kaikaim Bik Boi. Na ol lain i gat adiksen long drink bia o yusim drak nogut, ol i tok long kaikaim sampela gutpela kaikai taim ol i tingting long dring or smok. I ken i gat sampela arapela samting tu inap long helpim yumi.
Stap Longwe long ol Samting i Laik Grisim yu long Sin
Na narapela samting i olsem: Yumi i mas stap longwe long ol hap i wok long grisim yumi long bihainim ol dispela adiksen bilong yumi. Buk Baibel i tokim yumi long yumi i mas ranawe longwe long ol dispela samting i wok long pulim yumi long mekim sin. Ol lain i laik pilai laki, ol i mas stap longwe long ol kona we ol i save sindaun na mekim olsem. Sapos yu save lukim piksa nogut, orait yu no ken lukim fon o ol narapela samting long ples hait. Ol lain i save dring bia tumas, ol i mas stap longwe long ol manmeri na ol pati i save grisim ol long mekim dispela pasin nogut.
Long stopim olgeta pasin nogut, yumi mas bihainim ol gutpela pasin tasol. Sampela taim sampela man na meri bai lukim TV o narapela samting long fon planti tumas bikos ol i les long sindaun na stori wantaim ol arapela manmeri. Orait, em gutpela long yumi i wok long stori wantaim planti manmeri. Sampela man na meri bai bihainim ol adiksen bikos ol i gat planti hevi na ol i save wari tru. Orait, em gutpela long yumi i wok long kisim sampela taim long sindaun na malolo na stori long ol hevi bilong yumi wantaim ol arapela manmeri. Yumi mas bihainim ol dispela kain gutpela pasin; sapos nogat, nogut wantu yumi pundaun na stap aninit long strong na pawa bilong adiksen gen. Na, em tru, sampela taim yumi bai bihainim pasin bilong ol adiksen gen, tasol yumi mas klia, long marimari bilong God yumi inap long wok long brukim strong bilong ol adiksen, na bai yumi i bihainim ol gutpela pasin.
Wokabaut Wantaim Bikpela
Na nambawan samting yumi mas mekim long brukim strong bilong ol adiksen i olsem: Yumi mas wokabaut wantaim Bikpela. Yumi mas save long wok na pasin bilong Em. Taim yu kirap long moning yu mas ritim Tok bilong God na prea. Na kirapim wanpela plen: Hau bai mi lotuim God today? Hau bai mi bihainim pasin na laik bilong Em? Orait, mekim wok long olgeta gutpela samting. Pasin bilong wok em i bikpela samting long brukim strong bilong ol adiksen (Gutpela Sindaun 23:19-21). I gat sampela taim we yu save pilim dispela pawa bilong adiksen i pulim yu long mekim sin? Orait, long dispela taim em i gutpela long yu i go na sindaun wantaim narapela bilipman o bilipmeri, o redim sampela kaikai bilong givim narapela husat i gat sik, o go sindaun na stori wantaim wanpela man o meri i nogat pren o femili bilong en, o go klinim sios. Na beten oltaim (1 Tesalonaika 5:17). Na, taim yu kamap long pinis bilong olgeta de, ritim Tok bilong God gen, tok tenkyu long God long olgeta blesing Em i save givim yu, na slip gut olsem yu ken bihainim laik bilong God long tumora tu.
Hau God i Kisim Bek Bill
Bill em i gat bikpela adiksen long bia na pilai laki. Em i save westim olgeta mani bilong em long ol dispela adiksen, na famili bilong em i gat hevi tru long dispela pasin nogut. Na long wanpela de, meri bilong em i les olgeta. Em i ting em bai gutpela long Bill i ken kisim bikpela sik stret, nogut taim Bill i ting em bai dai, em bai senisim laip bilong em. Olsem na meri bilong em i beten, “Bikpela, inap yu ken givim bikpela sik long Bill. Em i mas kisim sik na kamap klia olsem olgeta pasin bilong em i no gutpela. Helpim Bill long kisim save olsem laip bilong em i samting nating sapos em i no bihainim yu.”
Na God i bin harim dispela prea bilong meri bilong Bill. Bill i kisim bikpela sik stret. Dokta i tambuim em long dring bia, na bikos em i sik, em i slip long bet na em i no inap raun na pilai laki. Em i ting em bai dai, na em i tanim bel na bilip long Bikpela. Na tude Bill i save lotu long sios wantaim meri bilong em. Na meri bilong em i save tok olsem, “Bill em i senis olgeta. Em i narakain man tru.”
Long olgeta Kristen i pait long brukim pawa na strong bilong ol adiksen mi tok olsem: Em i marimari bilong God tasol i inap long senisim laip bilong yumi, na helpim yumi long stap strong insait long dispela nupela laip (Taitus 2:11-14). Olsem na, sapos Pikinini i mekim yupela i kamap fri, orait yupela i stap fri tru.