Nau Yumi No Ken Larim Wanpela Samting i Bosim Yumi
Pasto Tony O. Aufa
Wanpela yangpela man, krismas bilong en i 18. Ol lain long sios i askim em long go skul long Tok bilong God na em ting: “Mi man tu, ya, na mi gat laik bilong mi yet. Mi yangpela yet olsem na larim mi amamasim laip bilong mi pastaim.” Em i save go lotu wan wan taim. Tasol long hait em i save raun wantaim planti meri na em i kisim AIDS na i dai. Ating yu gat stori olsem tu?
Yumi olgeta i save laik bihainim laik bilong yumi yet, a? Planti taim sapos narapela lain i tokim yumi long lusim ol samting yumi laikim na bihainim laik bilong ol, bai yumi tok,” Larim mi mekim laik bilong mi yet.” Yumi klia long dispela Tok Pisin, ha? Tasol yumi mas save gut olsem Bikpela i mekim yumi bilong Em yet. Krais i baim yumi pinis long blut bilong Em yet na yumi bilong Em tasol.
Yu save tu olsem planti taim laik bilong yumi save bihainim laik bilong Satan. Tingim Adam na Iv! Ol i bihainim laik bilong ol yet na bungim hevi. Olsem tasol, sapos yumi bihainim laik bilong yumi yet, bai yumi bungim bagarap.
HIV/Aids, gonorea na kain sik olsem i kamap long pasin bilong bungim bodi wantaim planti man o meri. Maus kensa na tit bagarap long kaikai planti kambang, daka na buai. Planti suga i save kamapim sik suga (diabetes). Lang kensa i kamap long smok. Yumi no gat spes long toktok long olgeta sik. Tasol em i tru olsem olgeta sik na sin i kamap long yumi bikos yumi no bihainim laik bilong Bikpela (Stat 3).
NAU YUMI, YUMI NO KEN LARIM WANPELA SAMTING I BOSIM YUMI.
Bikpela i tok long yumi mas bosim ol samting Em i mekim (Stat 1:26-28). Em i no tok bai ol dispela samting mas bosim yumi. Goap na tingting nogut i no ken bosim yumi. Yumi putim long Tok Pisin bilong tude: Dispela ol samting i no ken pawarim mi. Krais i givim mi pawa pinis long bosim laik bilong bodi. Em i givim yumi strong inap long daunim laik bilong olpela bel o `self-control ” olsem wanpela sid bilong kaikai bilong Holi Spirit (Galesia 5:23).
Olsem na Aposel Pol i tok: “Mi no ken larim wanpela samting i bosim mi” (1 Korin 6:12). Wanem samting i save bosim yu?
Yu save tu olsem planti taim laik bilong yumi save bihainim laik bilong Satan. Tingim Adam na Iv! Ol i bihainim laik bilong ol yet na bungim hevi. Olsem tasol, sapos yumi bihainim laik bilong yumi yet, bai yumi bungim bagarap.
Planti taim yumi save mekim ekskius long bihainim laik nogut bilong bodi olsem ol lain Korin tok, “Olgeta samting i orait long mi mekim.” Mi ken dring dispela, mi ken kaikai dispela, mi ken mekim olsem. Em bodi bilong mi yet, Em mani bilong mi yet, mi laik baim wanem, bai mi baim long laik bilong mi yet.
“Em diwai ya, bilong wanem yu tok mi no ken kaikai?” Em i gutpela askim. Tasol em i moa gut yu askim yu yet: Dispela samting bai i helpim mi olsem wanem? Yu skelim. Yu westim mani, yu kamap sot, yu pilim hangre na yu dinau gen. Skelim yu yet gut na bai yu lukim olsem yu wok long kilim yu yet i stap.
Sampela bilong yumi save tok, “Em ol hevi bilong graun, i no wanpela samting.” Harim, yumi yet i save kamapim hevi, i no graun. Bikpela i givim ai na tingting long lukluk na skelim gut laip na nogut bai yumi wokabaut olsem wanpela aipas man na nogat gutpela tingting.
Pol i tokim ol lain Korin olsem ol manmeri i save pamuk, lotuim ol giaman god, spak na longlong nabaut bai i no inap i go insait long Kingdom bilong God (1 Korin 6: 9-10).
Sampela bilong ol i bin stap olsem bipo. Tasol nau God i wasim ol long blut bilong Krais (v.11) na ol i bilong Em yet. Olsem na ol i no ken sin moa.
Bodi bilong yumi i no haus bia o haus pamuk. Nogat tru! Em i haus bilong Holi Spirit yet (v.19)! Yumi mas larim Holy Spirit i bosim laik bilong yumi.
Harim gut, Krais Jisas i kam long graun na i bihainim laik bilong God Papa i go inap long Em i dai. Em i kirap long dai wantaim pawa. Olsem na Em i ken senisim yu bikos Em i senisim mi. Yu kam long Jisas! Em bai givim yu nupela laik na bai yu bihainim laik bilong Em na Em bai i stap bosman bilong yumi oltaim.