Mi bin stat long smokim mariwana long taim mi olsem 13-pela krismas na mi smok klostu long 17-pela krismas olgeta. Mi bin traim ol arapela samting tu, olsem bia na brus, tasol mariwana em i winim ol. Mi smok planti taim mi planim gaden bilong mi yet. Mi bin ting olsem mi bai i no inap tru long lusim dispela pasin. Mi tokim ol lain i tokim mi long lusim mariwana olsem em i wanpela diwai Bikpela yet i kamapim olsem ol arapela diwai. Tasol mi rong na kranki olgeta. I no bikos God i kamapim wanpela samting yumi ken smokim. God i no mekim olgeta samting bilong yumi mas kaikai, dring o smok. Yumi mas kaikai ol lip i gat poisen o nogat? Nogat tru ya! Mi tok tenk yu long God olsem mi stop long smok. Mi save yu ken lusim tu.

Nau mi lukim olsem taim mi smokim mariwana em i bin wok long kilim mi. I gat ol narapela samting tu i bin wok long bagarapim tingting na sindaun bilong mi. Pastaim, mi abusim o mi no yusim dispela samting long laik bilong Bikpela. Ating God i mekim mariwana bilong mekim narapela wok tasol mi bilip olsem yumi no painimaut yet. Na tu, mi bagarapim bodi bilong mi long smokim mariwana tasol. Mi no bin mekim wanpela gutpela samting long laip bilong mi yet. I olsem mi tromoi laip bilong mi long wanpela bikpela baret na bai wara i karim i go. Mi no bosim laip gut. Pasin bilong smok i kalabusim mi. Na mi laik lusim dispela kalabus bilong smokim mariwana na yusim save God i givim mi. Sampela taim mi pilim olsem mi wanpela masin i nidim fuel long wok. Tasol mi no wanpela kain masin olsem ka; God i wokim mi olsem piksa bilong Em yet. Taim mi klia nau olsem dispela liklik amamas mariwana i save givim i no save stap longpela taim, em i save giaman tasol, na givim mi moa trabel, mi laik lusim olgeta.

Wok bilong lusim mariwana i no kam isi. Pastaim, mi karim ol hevi bilong mi i go long Bikpela long beten. Mi traim long ritim Tok bilong God planti. Mi no poromanim ol lain i save smok. Na mi no planim mariwana moa. Mi no go long ol hap we ol i save salim mariwana tu. Taim laik bilong smok i kirap, mi waswas pastaim, na slip. Sampela mun bihain, laik bilong smok em i lusim mi.