EDITORIAL
Hop i Stap
By Pastor Ryan deJonge
Davi em i bel hevi.
Davi na meri bilong em, Miriam, i no long taim i go pinis na tupela i stat go lotu long wanpela gutpela sios we ol i save autim gutnius bilong Krais. Tasol maski ol i save lotu, marit bilong ol i no kamap orait. Ol i save belhat, tok kros, na pait tumas long ol liklik samting tasol. Asde, Davi i bin lukautim pikinini bilong ol i gat tripela krismas na pikinini i kapsaitim wanpela pot rais long paia. Miriam i belhat nogut tru long Davi na em i kisim wanpela ain na klostu em i paitim em nogut tru. Tasol wantu em i luksave long rong bilong em yet, olsem na em i putim ain daun, em i holimpasim Davi, na krai nogut tru.
Davi i amamas olsem Miriam i no bin paitim em, tasol taim ol i sindaun na toktok long dispela, bel bilong em i hevi yet. Wai? Bikos marit bilong ol i no kamap gut, na em i no save long wanpela marit man na meri husait i save stap strong long pasin bilong God bai ol i ken kamap olsem piksa bilong gutpela marit. Tru, ol i save long sampela strongpela Kristen man, na sampela strongpela Kristen meri, tasol ol i no inap tingim wanpela strongpela Kristen marit long setelmen bilong ol.
I nogat wanpela. Olgeta marit ol i save lukim i pulap long pait, pasin pamuk, pasin bilong daunim narapela, o pasin bilong raun olsem man i no gat meri (o meri i no gat man).
Hau bai marit bilong ol i kamap strong sapos ol i no gat wanpela marit man na meri long kamap olsem piksa bilong gutpela marit bilong helpim ol?
Marit Bilong Yu i Olsem Wanem?
Satan em i birua bilong olgeta wanwan marit long PNG. Yumi save harim olsem 70% bilong olgeta meri bilong PNG i bin kisim bagarap long han bilong narapela lain. Wankain long pasin bilong paitim meri: 70% bilong olgeta meri, man bilong ol i paitim ol. Na i no man tasol i wok long mekim nogut, planti meri tu i save paitim man bilong ol, sakim tok bilong ol, o ol i no wokabaut stret na mekim pasin pamuk. Hamas marit i wok long bruk? Hamas i bruk pinis?
Marit bilong yu i olsem wanem? Noken giaman. Marit bilong yu i gutpela, o nogat?
Sapos Mi Laik Senis i Mas Kamap?
Hop i stap long olgeta pes bilong dispela magazin. Mipela i no raitim dispela magasin long toktok planti long ol marit i bararap o bruk pinis. Yumi save pinis long dispela. Nogat, mipela i raitim dispela magasin long tokim yu olsem, i gat hop i stap. Hop i stap bilong olgeta man na meri. Dispela hop yumi ken painim long Jesus Krais tasol. Sapos yu laik marit bilong yu i mas senis, orait, yu mas lukluk long Jisas Krais.
Davi na Miriam, tupela i bel hevi bikos ol i ting olsem ol i no gat wanpela piksa bilong gutpela marit. Tasol gutpela piksa i stap. Long Efesus 5, Aposel Pol i tok olsem Jisas Krais na meri bilong em, em i Sios, tupela i gutpela piksa tru bilong marit God i bin givim long yumi.
Sapos yu laik marit bilong yu i mas senis, orait, yu mas lukluk long Jisas Krais.
Senis i Luk Olsem Wanem?
Planti taim, yumi save lukluk long ol arapela man long lukim gutpela piksa long man. Yumi lukluk long papa bilong yumi, ol arapela papa, bikpela brata o narapela man na yumi save bihainim pasin bilong ol. Tasol sapos yu laik kamap olsem trupela Kristen man long meri bilong yu, yu no ken lukluk long ol arapela man, yu mas lukluk long Jisas Krais. Em wanpela tasol Em i trupela man olgeta.
Planti man long PNG ol i pret long kamap olsem wanpela wik man o meripes man, olsem na ol i save kamap olsem wanpela nogut bosman long meri bilong ol. Ol i save mekim meri bilong ol i kamap olsem wokmeri nating na ol i save paitim ol. Tasol Jisas i no save mekim kain pasin long meri bilong Em. Tru tumas, Jisas i gat pawa. Em i King bilong olgeta king, Bikpela bilong olgeta bikman, na Em i gat pawa bilong bosim win na solwara. Tasol Jisas i no save yusim pawa bilong Em long mekim nogut long meri bilong Em. Nogat tru. Em i save “givim kaikai long en na lukautim em gut” (Efesus 5:29). Trupela Kristen man i save givim gutpela kaikai – kaikai bilong bodi na kaikai bilong spirit tu – long meri bilong em. Em i save lukautim bodi bilong meri bilong em, na em i save lukautim gut spirit bilong em moa yet.
Yumi man i save ting olsem yumi stap het bilong meri bilong yumi na bikpela wok bilong yumi em i bilong bosim ol olsem wokmeri. Tasol Krais i soim yumi narapela pasin. Tru tru, em i stap het na Em i save bosim yumi. Tasol nambawan wok bilong En em i bilong laikim tru meri bilong Em. Em i laikim Sios na givim bel bilong Em long mekim em i kamap holi. Olsem tasol yumi man, dispela em i namba wan wok bilong yumi: yu mas laikim tru meri bilong yu, na yu mas givim bel bilong yu long em bilong mekim em i kamap holi long ai bilong God.
Ol meri tu i save bihainim kainkain pasin ol i ting bai mekim ol i kamap gutpela meri. Planti i wanbel long dispela tingting olsem meri i mas kamap olsem wokmeri nating long man bilong em, na ol i save sutim tok long wanpela meri taim man bilong en i kros na i paitim em. Sampela i bihainim tingting bilong sampela kantri olsem meri i noken aninit long man (olsem Feminism). Tasol trupela Kristen meri i no ken bihainim ol dispela kranki tingting. Em i mas lukluk i go long Krais na sios bilong Em. “Yupela meri, yupela i mas aninit long ol man bilong yupela, olsem yupela i save aninit long Bikpela” (Efesus 5:22). Taim wanpela Kristen meri i aninit long man bilong em, em i no harim tok bilong man tasol, nogat, em i harim tok bilong Jisas Krais yet, husait i dai pinis bilong kisim bek em.
Planti meri, taim man bilong ol i no mekim gutpela pasin, ol i save sakim tok bilong ol. Ol i ting olsem ol i bihainim gutpela tingting olsem: sapos man bilong mi i no kamap gutpela man olsem mi ting bai em i mas kamap, mi bai mekim nogut long em. Tasol Tok bilong God i againstim dispela tingting na em i tokim olgeta meri olsem “Meri i mas i stap aninit long man bilong en na mekim gutpela pasin long em” (Efesus 5:33). Na sapos man i no save mekim gutpela pasin, na em i no gutpela man, olsem wanem nau? Ol meri, Tok bilong God i tokim yupela long no ken pret na yupela i mas mekim gutpela pasin yet. Bilong wanem? Bilong man bilong yu i ken lukim gutpela pasin bilong yu, na Krais yet i ken yusim dispela long tanim bel bilong man bilong yu (1 Pita 3:1-6).
Bai mi senis olsem wanem?
Em i hatwok tru long senisim pasin. Maski yu save olsem yu mas senis, maski yu save bai yu senis olsem wanem, tasol mekim senis i kamap bai i had olgeta. Bai yu stretim marit i bruk pinis olsem wanem? Bai yu kamapim laikim tru na rispekt insait long marit bilong yu olsem wanem? Bai yu senisim bel bilong yu i save mekim sin olsem wanem?
Harim, trupela bekim bilong dispela ol askim em dispela. Yu na mi i no inap. Nogat tru. Tasol God Em i inap. God Papa i ken lusim sin bilong yumi bikos Em i laikim yumi tumas. Blut bilong Jisas Krais wanpela tasol i ken wasim yumi na mekim yumi kamap klin olgeta. Holi Spirit wanpela tasol i gat pawa long senisim bel bilong yumi. Long gutnius bilong Krais tasol pasin laikim na gutpela pasin i ken pulimapim bel bilong yumi inap long yumi ken laikim ol arapela na mekim gutpela pasin long ol.
Tasol, yu mas bilipim tru God. Sapos yu no inap long givim laip bilong yu long God, marit bilong yu bai i no gat hop. Tasol sapos yu hop long God, tok sori long olgeta pasin nogut yu bin mekim, tanim bel, na trastim plen bilong God long marit bilong yu, God bai inapim olgeta tok bilong Em yet, na Em bai i helpim yu.
Hop i stap bilong yu na mi
Mipela i raitim dispela magasin long givim hop long kain manmeri olsem Davi na Miriam, na manmeri olsem yu na mi. Yumi olgeta i stap olsem ol sinlain, na yumi olgeta i nidim marimari bilong Bikpela. Yumi olgeta i olsem wanpela pamuk meri husait i nidim man bilong em long lusim sin bilong em na laikim em gen. God i mekim dispela pasin pinis long yumi insait long Jisas Krais.
Hop i stap long Davi na Miriam, na hop i stap long yumi olgeta. We? Long gutnius bilong Krais!