Plen bilong God Long Ol Maritman:
Ol i Mas Laikim Tru Meri Bilong Ol
By Pastor Tony O. Aufa
God i wokim ol man bilong kamap lida
God i wokim man bilong i go pas long meri bilong en.
God i wokim man pastaim na makim em long bosim olgeta samting God i bin wokim. Olsem na, taim Adam tupela Iv i brukim lo bilong Em, maski Iv i bin aigris na kaikai dispela prut tambu pastaim, God i singautim man na kotim em (Stat 3:9). I olsem God i tokim Adam, “Man, mi makim yu long givim stia long meri. Mi laik yu mas i go pas.”
God i bin makim Adam long makim maus bilong Em yet, bilong soim pasin laikim bilong God long meri bilong em. Tasol, Adam i no bin kamap gutpela lida. Taim Iv i kisim dispela prut tambu na kaikai, Adam i sanap na lukluk tasol, na binhainim em tu i kisim hap prut long meri bilong en na kaikai. Tasol em i sutim tok long meri bilong em na putim olgeta asua antap long em taim God i kotim em. Em i putim asua long God tu long Em i givim em dispela meri. Em i mekim pasin nogut tru! Adam i no luksave olsem yumi tupela i no save luksave olgeta taim olsem, em i wok bilong man bilong laikim tru na lukautim meri bilong em. Tingim, taim Adam i bin lukim meri bilong em nambawan taim, em i bin amamas tru na i tok olsem, “Bun bilong em i kamap long bun bilong mi, na mit bilong em i kamap long mit bilong mi.” Tasol nau, Adam i givim baksait long Iv. Adaim i traim long em i no ken stap insait long dispela trabel. Tasol trupela tok em i olsem, Adam i asua bilong dispela hevi. Bilong wanem, God i makim em long go pas long femili bilong em olsem wasman o hetman.
Adam i no soim pasin laikim tru bilong God long meri bilong en. Em i no inapim dispela wok God i bin givim long em. Sapos Adam i bin laikim tru meri bilong em, orait em bai mekim olgeta samting bilong banisim meri bilong em long ol giaman bilong Satan. Tasol Adam i no mekim olsem, na bilong dispela as, sin na dai i kam insait long dispela graun bilong yumi.
Jisas Krais em i Trupela Lida bilong Yumi
God, long marimari bilong em tasol, i bin promis long kisim bek yumi long wok bilong Pikinini tru bilong Adam, Jisas Krais (Stat 3:15). Krais, Em i nambatu Adam, i kamap namelman long God na yumi man bilong kamapim wanbel (Rom 5:1,12). Insait long Krais, God i soim yumi piksa bilong trupela man. Krais i laikim tru meri bilong Em, em i sios bilong Krais, inap long Em i givim laip bilong En bilong kisim bek sios. Adam i putim asua long meri bilong em na i tok em i no save long em. Tasol Krais i kisim asua bilong yumi bilong mekim yumi kamap ol pipol bilong Em tru gen.
Yumi Ol Man i Mas Kamap Man Olsem Krais
Ol man, Krais i no dai bilong kisim bek yu tasol. Nogat. Em i dai bilong senisim yu. Krais i dai bilong mekim yu i kamap wanpela gutpela man, wankain olsem em yet bai marit bilong yumi i ken kamap olsem wanpela piksa bilong Krais na sios bilong em. Ol man i mas laikim tru meri bilong ol, olsem Krais i laikim tru sios bilong Em (Efesus 5:25).
Ol brata insait long Bikpela Jisas Krais, sapos God yet i makim yumi long laikim tru meri bilong yumi olsem Krais i laikim tru sios bilong Em, yumi i no ken larim wanpela samting i pasim yumi long inapim dispela wok. Yumi i no ken laikim ol meri bilong yumi long taim ol i inapim laik bilong bungim bodi wantaim tasol, o taim ol i harim tok bilong yumi tasol. Yu i no ken laikim tru meri bilong yu taim em i yangpela na naispela tasol. God i singautim yumi long laikim tru ol meri bilong yumi long olgeta taim, maski wanem samting i kamap.
Yumi no ken laikim ol meri bilong yumi long taim ol i nogat sik tasol. Yumi no ken laikim ol meri bilong yumi long taim ol i karim pikinini tasol. Yu no ken laikim meri bilong yu taim em i kukim gutpela kaikai long yu tasol. Yu no ken laikim meri bilong yu long taim em i respektim yu tasol. Em i no samting bilong taim em i amamasim yu tasol. Em i no samting bilong taim em i amamasim ol lain bilong yu tasol. God i givim dispela bikpela wok long yumi bilong laikim tru na lukautim meri bilong yumi, maski wanem samting i kamap o wanem tingting ol arapela i gat.
Mi tingim yet pes bilong ol lain i helpim meri bilong mi long haus sik taim mi ran i go insait long ples bilong ol mama i karim. Mi go insait na holim pikinini bilong mi. Mi klia olsem long planti hap em i tambu tru long man i holim nupela blut long taim mama i karim. Ol i bilip olsem man bai sik na bihain dai sapos em i tachim nupela blut. Olsem na dispela wok em ol i larim i go long han bilong ol arapela mama long mekim. Dispela em wanpela giaman i save pasim man long inap tru wok bilong em. Tasol mi bilip olsem dispela em i wok bilong yumi man. Yumi mas sanap klostu long ol meri bilong yumi olgeta taim olsem Bikpela Krais Jisas i save sanap klostu long meri bilong Em long olgeta taim. God i laik bai yumi i gat kain laikim long ol meri bilong yumi.
God i givim dispela bikpela wok long yumi bilong laikim tru na lukautim meri bilong yumi, maski wanem samting i kamap o wanem tingting ol arapela i gat.
Yumi mas i go pas long femili bilong yumi wantaim pasin laikim tru bilong Krais. Soim dispela laikim tru bilong Krais long meri bilong yu. Tokim em olsem, Krais em i gutepla man tru. Tokim em long Tok bilong God. Go pas long em long olgeta taim. Na nambawan samting em i dispela: soim em wanem pasin yu laik em i mas bihainim. I no orait yumi tokim ol arapela long mekim wanem samting yumi yet i no save mekim, a? Sapos yu laik helpim meri bilong yu long em i no ken bagarapim nating nem bilong ol arapela, yu mas i no ken bihainim dispela pasin nogut. Yu no ken belhat o krosim em olsem, “Mekim olsem!” o “No ken mekim olsem!” Bilong wanem, dispela pasin bai mekim hevi i go bikpela moa. Tokim em isi tasol olsem Jisas i save les tru long pasin bilong bagarapim nating nem bilong ol arapela. Lukautim em [meri bilong yu], stap olsem piksa bilong gutpela man long em, na givim stia tok long em wantaim laikim tru.
Taim em i les long lusim rong bilong yu o arapela, yu mas go pas na lusim rong bilong em. Planti taim, yumi laik ol arapela i lusim rong bilong yumi pastaim. Yumi save putim sampela kain mak olsem, “Mi bai laikim yu tru…. sapos yu respectim mi!” “Mi bai helpim yu….sapos yu amamasim mi!” Tasol laikim tru bilong Krais i no gat mak bilong en. Em i laikim yumi tru taim yumi stap olsem birua bilong em (Rom 5:8-10). Em i bin mekim gut long yumi, maski yumi save mekim gut long yumi yet tasol. (Mak 10:45)
Lukluk i go long Krais.
Yumi olgeta i save olsem yumi i no inap bihainim tru pasin laikim bilong Krais. Olsem na, yumi ol man, yumi i mas save lukluk long Krais oltaim. Yumi ken go pas long femili bilong yumi wantaim pasin lakim tru sapos yumi laikim tru Krais long bel bilong yumi. Em i trupela wasman, hetman na lida bilong yumi.