Plen Bilong God long ol Maritmeri:
Ol i Mas Aninit long Man Bilong Ol Bilong Helpim Ol
By Pastor Pastor Nawai and Daiva Renagi
Buk Baibel i tok wanem long ol maritmeri i mas aninit long man bilong ol?
“Yupela meri, yupela i mas aninit long ol man bilong yupela, olsem yupela i save aninit long Bikpela” (Efesus 5:22).
Taim ol lain tude i harim dispela tok “aninit long man”, ol bai i gat kain kain tingting long dispela tok. Ol lain i save toktok long “meri raits”, olsem ol meri i mas i stap wankain long ol man, ol bai i les tru long harim dispela tok “aninit long man”. Sampela narapela lain bai harim dispela tok, na ol bai ting i gat dispela mining: Ol man i olsem bos bilong ol meri, na ol meri i stap olsem kago samting bilong man, na man i ken bosim long laik na strong bilong em yet. Planti lain long PNG i gat dispela tingting.
Tasol dispela tok “aninit long man” i kam long Baibel, olsem na yumi mas go long Baibel long kisim save long trupela mining bilong dispela tok.
Long stat bilong dispela graun, long Gaden Iden, God i bin i go long Adam na Iv na tokim tupela long pasin tupela i mas bihainim. Tasol tupela yet i mas makim wanem rot ol i laik bihainim: bai ol i aninit long tok bilong God na amamas long Em i bosim ol, na redi long bihainim olgeta tok bilong Em, o bai ol i sakim tok bilong God na putim ples klia olsem ol i les long Em i bosim ol na ol i les long gutpela lukaut bilong Em? Taim Adam tupela Iv i no pundaun long sin yet, ol i amamas long stap aninit long God na laikim tru bilong Em, na ol i stap wanbel wantaim Bikpela.
Taim Aposel Pita i tokim ol yangpela man long aninit long hetman bilong sios, pastaim em i stori long ol hetman na tokim ol olsem ol i stap olsem wasman bilong sipsip bikos ol i stap aninit long Namba Wan Wasman bilong sipsip (1 Pita 5:1 ff). Taim ol hetman i mekim wok, ol i mas amamas long mekim dispela, olsem God i laikim ol i mekim. Na ol i no ken mekim dispela wok bilong kisim pe. Ol i mas mekim ol gutpela pasin tasol, bai ol arapela i ken lukim na bihainim. God i givim dispela wok long ol, olsem hetman bilong sios, tasol ol i mas mekim gutpela pasin tasol, na stap olsem gutpela hetman na lida.
Dispela teks i putim ples klia olsem taim Baibel i mekim tok olsem “stap aninit long narapela”, em i samting bilong stap aninit long Bikpela pastaim. Yumi inap lukim dispela samting long 1 Pita 2:13 tu we Pita i tok olsem olgeta kain gavman i stap aninit long Bikpela, na long 1 Pita 3:1, Pita i tok olsem olgeta man i stap aninit long Bikpela. Ol maritmeri, taim yu stap aninit long man bilong yu i min olsem yu amamas long em i stap olsem lida bilong yu bikos God yet i makim em long mekim olsem na long lukautim yu tu.
Wanem samting bai kamap sapos yu no stap aninit long man bilong yu?
Sapos yumi sakim dispela tok bilong God long stap aninit long man bilong yumi, orait hau bai ol pikinini i inap kisim save long dispela pasin bilong stap aninit long narapela? Hau bai ol pikinini i inap klia long pasin bilong aninit long gavman o lo bilong kantri, sapos ol i no lukim dispela pasin long mama i stap aninit long papa bilong ol? Em i gutpela olsem pikinini i lukim mama bilong em i aninit long namba God i givim long papa bilong em, na aninit long God tu. Taim wanpela femili i bruk na bagarap, dispela pasin bilong aninit long narapela, olsem God yet i makim, em bai i bagarap tu.
Tasol, sapos yu sakim tok bilong God na yu no aninit long man bilong yu, em bai mekim namba God i givim long man bilong yu olsem samting nating tu. Taim yu les long aninit long em, hau bai em i mekim wok olsem lida bilong yu, olsem God i tokim em long mekim? No ken lus tingting: Krais i stap olsem Het bilong yu na bilong em, na man bilong yu i mas bihainim Krais na aninit long Em (1 Korin 11:3).
Na sapos yu no aninit long man bilong yu, dispela bai mekim ol arapela lain i ting olsem namba bilong man bilong yu em i liklik samting. God yet i kirapim dispela pasin bilong sampela lain i bosim narapela lain, long wanwan femili na long kantri na gavman tu. Olsem tasol, taim ol maritmeri i no aninit long man bilong ol, em bai afektim na bagarapim komyuniti bilong ol tu; na taim komyuniti em bagarap, orait kantri bilong yumi bai bagarap tu. Pasin bilong aninit long narapela em bai strongim tru kantri bilong yumi. Sapos yu laik save bilong wanem dispela naispela kantri bilong yumi i no strong tumas, orait, lukim ol komyuniti bilong yumi – ol yangpela lain bilong yumi ol i no save honaim na respektim ol lida bilong ol, ol i no save laikim narapela na daunim laik bilong ol yet. Ol i no bin lainim dispela pasin bilong stap aninit long narapela.
Pasin bilong Stap Aninit long Narapela em i Gutpela Wok long Mekim
Pasin bilong stap aninit long narapela em i no samting bilong kamapim pait namel long man na meri. Nogat, em i samting bilong gutpela wok maritmeri i ken mekim insait long femili bilong em. I no olsem man i givim dispela wok long meri long daunim em na bagarapim em. Nogat. Dispela wok i kam long God yet; God i singautim ol maritmeri long mekim dispela bikpela wok stret, na em i gutpela samting tru long mekim. Meri i no aninit long man bilong em bikos man bilong em i tokim em long mekim olsem. Nogat. Em i gat bikpela laik long mekim olsem, na em i stap belgut na bel isi taim em i mekim olsem bikos em i save olsem dispela kain pasin em i gutpela moa yet long ai bilong God (1 Pita 3:4).
Taim yumi i aninit long man bilong yumi, yumi aninit long Krais. Maski man bilong yumi i no lukautim yumi gut, Krais yet bai lukautim yumi, na Em yet bai lidim yumi.
Taim meri i stap aninit long man bilong em, em i no stap olsem wanpela wokmeri nating. Nogat, em i stap olsem wokmeri bilong God, na God bai i yusim em long strongim kantri bilong yumi tu.
Tasol, sapos man bilong em i no bilip long God, meri i mas mekim wanem?
Nogut yu gat dispela askim: “Hau bai mi aninit long man bilong mi sapos man bilong mi i no aninit long God?”
Dispela em i bikpela hevi bilong planti meri, bikos sin i bin bagarapim dispela graun. Na yumi ken sori tru bikos i gat planti ol man i stap husat i no save laikim tru meri bilong ol, na ol i no lidim na bosim gut meri bilong ol olsem God i tokim ol long mekim.
Tasol 1 Pita 3 i ken helpim yumi long dispela hevi tu. Taim Pita i stori pinis long dispela poroman bilong man wantaim meri bilong em, orait em i tokim yumi long lukluk long Krais:
“Long bel bilong yupela, yupela i mas putim Krais wanpela Em i stap Bikpela bilong yupela. Na sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol. Tasol yupela i mas bekim tok bilong ol long tok isi na long gutpela pasin. Na oltaim yupela i mas i stap stret long ai bilong God. Olsem na sapos ol i tok nogut na tok bilas long yupela, orait ol man i save mekim dispela tok bilas long gutpela pasin yupela i mekim bilong bihainim Krais, ol bai i sem long dispela tok ol i bin mekim. Sapos God i laik bai yumi i kisim pen long gutpela pasin yumi mekim, em i orait. Tasol sapos yumi kisim pen long pasin nogut yumi mekim, em i samting nogut” (1 Pita 3:15-17).
Taim yumi i aninit long man bilong yumi, yumi aninit long Krais. Maski man bilong yumi i no lukautim yumi gut, Krais yet bai lukautim yumi, na Em yet bai lidim yumi. Sapos yumi no aninit long man bilong yumi na man bilong yumi no lukautim yumi gut, orait yumi no kisim wanpela samting! Tasol, sapos yumi harim Tok bilong God na yumi aninit long man bilong yumi na yumi i kisim hevi long dispela, orait yumi i bihainim lek mak bilong Krais!
Krais Em i namba wan lida, Em i gutpela lida tru bilong yumi. Em i givim laip bilong Em long yumi. Na taim yumi bilip tru long Em, orait bai yumi i amamas long stap aninit long Em.