Yu harim kain tok olsem dispela bipo a?

“Olgeta samting i orait long mi mekim long wanem God i tok long buk Stat 1:31 olsem olgeta samting God i wokim em i gutpela.”

“Baibel i no tokaut em i sin long dispela pasin mi mekim.”

“Olgeta manmeri i save mekim dispela pasin, olsem na sapos mi mekim, em i orait, em i no rong pasin mi mekim.”

Harim! Sapos yu save gat kain tingting o mekim kain tok olsem, mi laik askim yu: Yu save mekim dispela pasin long nem bilong God na Krais Jisas? Yu save mekim dispela long givim biknem, hona, prais long Krais? Kolosi 3:17 i tok olsem, “Long toktok bilong yupela… wok bilong yupela… olgeta samting yupela i mekim, yupela i mas mekim long nem bilong Bikpela Jisas. Na long nem bilong Em yupela i mas tenkyu long God Papa.” Yu mekim dispela pasin long wanem as tru?

Mi laik autim wanpela pasin we i no save givim gutpela bel long ol arapela Kristen na haiden lain tu, taim ol i lukim ol Kristen i mekim dispela pasin. Mi toktok long wanem pasin? Em pasin bilong kaikai buai na pulim smok. Yu ting em i orait long wanpela Kristen i kaikai buai na pulim smok? Yu ting em i sin o nogat?

Mi bai autim sampela tingting klia long Baibel. God i gat wanem tingting long dispela pasin? Pastaim yumi mas save olsem God i wokim yumi. Bodi na spirit bilong yumi God i wokim. Em i wokim yumi long stap olsem piksa bilong em yet (Stat 1:26-27). Dispela i min olsem long bodi na spirit bilong yumi, yumi mas lotu long God, aninit na prea long God, na bihainim tok bilong Em. Dispela em i nambawan laik bilong God long yumi man. Na long dispela pasin God inap kisim biknem, hona, na prais oltaim.

Tasol sin i kam long graun, na sin i bagarapim laip bilong yumi. Sin i bringim dai na kainkain pen na hevi long bodi na spirit bilong yumi. Olsem na man na meri i save mekim kainkain pasin long bagarapim bodi na spirit bilong ol yet. Pasin bilong kaikai buai na pulim smok tu i wok long bagarapim bodi bilong man. Sapos yu save kaikai buai yu inap kisim maus kensa na planti ol arapela sik tu olsem tit i bagarap, sua nogut long bel, sik bilong gam, sik bilong kok, na iven yu ken i dai tu. Sapos yu pulim smok tu bai yu inap kisim kensa long wetlewa na arapela bagarap long bodi tu. Kain olsem kensa long maus, tit i bagarap, strok, ai bagarap, daiabitis, na yu inap dai tu long ol dispela samting.

Sapos yu yet save mekim dispela pasin taim yu sik, pilim pen o karim hevi, husat bai yu sutim tok long em? Bai yu sutim tok long God? Bai yu sutim tok long narapela lain? Em i asua bilong yu yet long sakim tok na bikhet.

Nogut yu bai tok olsem, “Nogat, dispela samting i no bosim mi. Mi kisim bilong amamas tasol.” Bai yumi save olsem dispela samting i wok long bosim yumi olsem wanem?

• Sapos yu gat dispela ol sik, pen, hevi long bodi bilong yu, tasol yu go yet na kisim buai na smok, orait em i olsem dispela samting i wok long bosim yu. Em i wanpela adiksen. Harim gut: God yet i wokim yu olsem Em yet na bodi na spirit i mas givim glori long Em wanpela tasol, tasol yu yet wok long bagarapim dispela bodi God i givim long yu.                                                                   
• Sapos yu sakim tok bilong sios lida na kaikai buai na smok long sios eria, em i klia olsem dispela pasin i bosim yu. God i makim ol long lukautim sios, tasol yu wok long sakim tok bilong ol (Hibru 13:7-8).                         
• Sapos yu no bihainim tok bilong gavman long noken kaikai buai long publik ples o tromoi ol pipia bilong smok o spetim buai nabaut long rot, o yu kaikai buai na smok long taim bilong wok, dispela ol samting i bosim laip bilong yu. God i makim gavman long mekim lo, tasol yu les long harim tok bilong ol (Rom 13:1-2).                                                             
• Sapos yu baim buai na smok tasol yu sot long mani bilong sapotim nid bilong femili olsem kaikai, skul fi, klos, marasin, etc., i kamap ples klia olsem dispela samting i bosim yu na i kamap olsem giaman god bilong yu. God i makim ol papamama long lukautim gut femili bilong ol (Efesus 6:4; 1 Timoti 5:8).                                                                                   
• Sapos pasin bilong kaikai buai o smok i wok long givim bel hevi long narapela long bilip bilong em na pasim narapela long kam lotu, mobeta yu lusim bikos yu no soim long pasin bilong laikim brata o susa bilong yu (Rom 14:15,19).