Dispela em i tok giaman! Jisas Em i God tru.

Em i wanpela Pikinini tasol (Only Begotten Son) bilong God, na Em i kam long God yet. Em i no kamap long wanpela taim olsem yumi tupela i bin kamap long dispela graun long wanpela taim. Nogat. Em i bin stap bipo bipo tru, na bai Em i stap oltaim oltaim tu. Sios bilong bipo na bilong tude tu i save autim dispela konfesen: Jisas Em i God tru.

Tasol, planti ol lain long tude i no save givim biknem long Jisas Krais olsem God yet. Ol i mas sem long lotuim Em olsem Bikpela na God bilong ol, olsem Thomas i mekim taim em i lukim Jisas i kirap pinis long matmat (Jon 20:28). Nogat, ol i bilip olsem God i krieitim (mekim kamap) Jisas, wankain olsem Em i krieitim nambawan ensel Maikel. I gat planti ol sios na ol riligen (bilip) long PNG tu i wok long tokim yumi olsem, Jisas Em i no God tru, na Em i no Pikinini tru bilong God i save stap oltaim. Ol i laik bagarapim stret trupela bilip na hop tru bilong ol Kristen long Papua New Guinea!

Bai mi toktok liklik long sampela bilong dispela lain:

1. Dispela Koran (buk) bilong ol Islam lain “i tok strong olsem Jisas Krais i no Pikinini tru bilong God na Em i no God tru. God bai i gat wanpela pikinini man husat i God tru na man tru wantaim olsem wanem? Ol i save presim god bilong ol, Allah, long dispela samting: ‘Yumi mas givim biknem long Allah. Bikos Em i no kisim Jisas olsem pikinini bilong Em…’” Na ol i save toknogutim ol manmeri i bilip olsem Jisas Em i Pikinini bilong God na Em i God yet olsem God.
2. Ol Jehovah Witness i tok olsem, Jisas i no God tru. Ol i tok olsem, God i krieitim (mekim kamap) Jisas pastaim long Em i mekim ol ensel na olgeta narapela samting. Ol i tok olsem, pastaim long Jisas i kam long dispela graun, Em i bin stap olsem namba wan ensel Maikel long heven. Na taim Jisas i stap long dispela graun, Em i man tasol na i no God tru. Na nau Em i stap long heven, Em i stap olsem namba wan ensel Maikel gen.
3. Ol Mormon i bilip olsem, i gat planti ol man i bin kamap olsem god. Ol i tok, “Bipo, God yet i stap olsem man olsem yumi, na nau Em i stap olsem wanpela man antap tru.” Wankain olsem, Jisas Krais i stap olsem wanpela man antap tru.

Tasol Baibel i tok wanem long Jisas? Tingim, Bikpela Jisas i bin askim ol disaipel bilong Em olsem, “Na yupela yet i tok mi husat?” Na Saimon Pita i bekim tok olsem, “Yu dispela man God i bin makim bilong kisim bek ol manmeri bilong En. Yu Pikinini Bilong God i gat laip”. Taim Bikpela Jisas i kirap gen long matmat, Em i go kamap long ol disaipel na ol i lotuim Em (Luk 24: 52). Bilong wanem? Bikos Em i God tru. Yumi no ken lotuim ol giaman god (lo namba wan). Tasol Jisas i no pasim ol disaipel long lotuim Em, bikos Em yet i God. Na bihain Em i salim ol i go bilong mekim olgeta manmeri i kamap disaipel bilong Em. Em i tokim ol long baptaisim ol long Nem bilong Papa na bilong Pikinini na bilong Holi Spirit (Matyu 28:19). Wanpela God tasol i stap – God Triwan!

I gat sampela moa tok i stap long Baibel i tokaut long Jisas Em God tru, o nogat? Yes, i gat planti. Bai yumi ritim sampela moa tok long Baibel i soim klia olsem Jisas i God tru na Pikinini Man bilong God i save stap oltaim.

1. Filipai 2:5-8 — “Yupela i mas holim wankain tingting olsem Krais Jisas i bin holim. Em i stap God tru, tasol Em i no ting long holimpas dispela pasin bilong i stap wankain olsem God. Nogat. Em i lusim dispela pasin, na Em i kamap olsem wokboi nating. Em i kamap olsem man na ol man i lukim Em i stap man tru. Na Em i daunim Em yet na i bihainim tok bilong God, i go inap long Em i dai, yes, inap long Em i dai long diwai kros.”
2. Matyu 3:16-17 — “Jisas i kisim baptais pinis, na kwiktaim Em i lusim wara na i kam antap. Na heven i op, na Em i lukim Spirit bilong God i kam daun olsem wanpela bilong ol dispela kain pisin ol i kolim balus, na em i kam i stap long Em. Na long heven wanpela maus i singaut olsem, ‘Dispela Em i Pikinini bilong mi. Mi laikim Em tumas. Bel bilong mi Em i amamas long Em.’”
3. Jon 5:18 — “Ol Juda i harim dispela tok na ol i laikim moa yet long kilim Jisas i dai, long wanem, Em i no kalapim lo bilong de Sabat tasol. Nogat. Em i tok, God Em i papa bilong Em stret. Long dispela tok Em i mekim Em yet i kamap wankain olsem God.”{Ritim Jon 1 tu}.
4. Kolosi 1:13, 19 — “Yumi bin i stap aninit long strong bilong tudak, na Em i bin kisim bek yumi na putim yumi insait long lain bilong Pikinini bilong en, Em dispela Pikinini em i save laikim tru…God i laik bai olgeta laip na pasin bilong Em yet i mas i stap long dispela Pikinini, olsem na God yet i pulap tru long Em.” (lukim 2:8-9 tu)

I gat planti moa teks i soim klia olsem Jisas Em i God tru. Sapos yu bilipim sampela narapela tok, em bai yu paul olgeta — em i tok giaman tasol.