Long helpim yumi save gut long dispela tingim dispela tripela man: Josep, Jop na Jisas!  

Josep (Stat 37-50). Ol brata bilong em ol i mangal long em na ol i laik bagarapim em.  Klostu ol i kilim em tasol, nogat, ol i salim em long Isip.  Long Isip, Josep i bungim taim nogut stret, na ol i kalabusim em nating.  Tasol God i gat plan na em inapim plan bilong insait long tingting nogut bilong brata bilong Josep. God i rausim em long kalabus na em i kamap Prime Minister bilong Isip.  Josep em i klia nau long strong na atoriti bilong God. Olsem Josep i tokim ol brata bilong em: “yupela i gat tingting long bagarim mi…tasol GOD…i gat tingting long helpim planti man (Stat 50:20).” God i yusim tingting nogut, God i bosim pasin nogut bilong ol brata bilong em na meri bilong Potifar long inapim plan bilong em. God em i BOS! Maybe God i gat laik long yusim yu. Na taim em i yusim yu em i bringim yu long ples nogut tru long inapim plan bilong Em. 

Jop.  (Buk Jop 1-2)  Nau tingim Jop.  Satan i laik bagarapim em tasol bipo Satan i bagarapim Jop, em i mas kisim tok orait long God. Satan, sanguma, ol samting bilong tudak i no inap bagarapim yumi sapos God i tok nogat! God em i BOS i no Satan o sanguma! Olsem na taim Jop i kisim bagarap, na ol stilim ol animal bilong em na ol tenpela pikinini bilong em i dai, em i no singautim ol glasman long kam. Skelim gut.  Em i no tokaut olsem:  husat i wokim sanguma long mi na pikinini bilong mi i dai?  Em i no wokim pe bek long bagarap em i bin kisim. Nogat, na nogat tru. Em i mekim wanem samting? Em i brukim skru long Bikpela na em i tok olsem:  “Bikpela yet i bin givim mi olgeta samting, na nau em i rausim pinis ol dispela samting. Olsem na mi litimapim nem bilong en (Jop 1:21).” Sapos olgeta manmeri long PNG i bihainim pasin bilong Jop, bai yu no inap lukim wanpela fait, wanpela lain i kilim narapela meri o man bikos ol i ting em i wokim sanguma long ol! Mi tok gen,  sapos olgeta manmeri long PNG i lukluk long God na wetim em long taim bilong sik, hevi na dai – bai yu no inap lukim wanpela moa pe bek.

Jisas.  (Gutnuis Matyu-Jon) Skelim dai bilong Jisas. Ol lain Farisi na save man bilong lo i laik kilim Jisas. Satan i stap long beksait bilong dispela belhat. Em i wok tu long bel bilong Judas long putim Jisas long han bilong birua. I luk olsem Satan i gat plan na em bai inapim plan bilong em. Plan bilong Satan em i olsem – kilim dispela Pikinini bilong God! Tasol Satan i wokboi nating bilong Bikpela. Ol spirit nogut ol i wokboi nating bilong Bikpela.  Skelim gut.  Taim Jisas i kirap bek long matmat na go antap. Pita i autim sermon long Pentikos. Long dispela sermon em i tok olsem “God yet i bin putim dispela man long han bilong yupela, olsem bipo yet em i bin tingim na i pasim tok pinis long mekim (Aposel 2:23).“  Olsem maski. Satan em i kirapim bel bilong ol lain long kilim Jisas, tasol em i no klia, dispela em i plan bilong God. Jisas mas i dai long kisim bek planti manmeri! God em i BOS i no Satan na ol wokboi bilong em! 

Olsem wanem na long yumi? Yumi mas klia long ol dispela samting.

1. God em i bos! Em i King. Em i lukautim na bosim olgeta samting. (Buk Song 97-99)
2. Nogat wanpela samting i stap autsait long autoriti, strong, save, power bilong em.
3. Na God i save bringim ol hevi, pen, sik na dai long yumi long strongim faith bilong yumi, pikinini bilong em (1 Peter 1:7).
4. Tru tumas insait long Krais God i laikim yumi tumas, na i nogat wanpela samting inap pasim dispela laikim tru bilong God i kam long yumi. Tru tumas sapos God em i stap wantaim yumi, husat bai i birua long yumi? (Rom 8:32-39)
5. Ya, God bai mekim gut long olgeta lain i bilip long Krais…bai yumi poret long wanem samting (Rom 8:28)?!

Olsem na yumi nogat nid long poret. Yumi nogat nid long wari. Yumi nogat nid long wokim pe bek. Yumi gat wanpela nid: bilip long God tasol!  Em i BOS!