Hau God i bin Kisim Bek Mi long Kalabus bilong Adiksen
Pasto Isidore Aufa
Gude long yupela olgeta manmeri i ritim dispela. God i ken marimari long yupela na mekim gut long yupela. Nem bilong mi em i Isidore Aufa. Tude, mi mekim wok pasto long Living Water Reformed Church long Kamkumung, Lae.
Mi laik serim liklik testimoni bilong mi wantaim yupela. Mi ken tok stret long yupela olsem mi no wanpela gutpela o stretpela man. Mi sinman tasol. Bipo planti samting i bin kalabusim mi na bosim laip bilong mi stret.
Mi bin save long God em i husat tru taim mi stap liklik mangi yet. Tasol taim mi gro kamap bikpela, sin i wok long pulim mi na bosim laip bilong mi narapela kain. Mi bin bagarap olgeta insait long laip bilong sin.
Mi bin stap olsem wanpela pamuk man, man bilong lukim piksa nogut, stilman, man bilong tok nogut, kros, belhat, pait, kaikai buai, smok mariwana na sigaret, na spak. Dispela ol samting na planti ol arapela samting tu i bosim mi stret na i wok long bagarapim tru laip bilong mi.
Mi laik stori long tupela samting tasol we i bagarapim laip bilong mi stret. Dispela ol samting em i alkohol na drak. Mi bin stap olsem wanpela man bilong spak stret. Mi bin traim olgeta kain alkohol yu ken tingting long en – SP i go long ol hat alkohol i go long hombru na stim wantaim.
Alkohol i wok long winim mi na bosim mi stret. Em i bagarapim tru laip bilong mi. Planti taim mi wok long spak tasol. Liklik mani mi save holim i save pinis long spak tasol na mi stap tarangu tasol.
Na antap moa long en, taim mi save spak, mi save mekim planti ol kainkain samting nogut; tok nogut, pait, kros, belhat, bagarapim ol man nating, mekim trabel, na kainkain samting nogut yu ken tingim. Iven mi bin go long kalabus long wanpela taim bikos long spak tasol.
Bikos long spak pasin bilong mi, planti manmeri i save les long mi, iven ol femili tru bilong mi tu i les long dispela pasin bilong mi. Na tu mi bin mekim planti birua long pasin bilong spak tasol. Spak i bin kalabusim mi na bosim laip bilong mi na i bin wok long bagarapim tru laip bilong mi.
Narapela samting em i drak, o spak brus. Spak brus tu i bin bosim laip bilong mi stret. Mi bin pas tru long spak brus. Mi bin smokim spak brus 20-pela yia olgeta. Mariwana i bin kamap olsem laip bilong mi stret. Mi save tok, “Em laip ya.”
Satan i wok long yusim dispela tupela samting long bosim laip bilong mi tru na i wok long bagarapim mi narapela kain tru. I luk olsem mi bin nogat hop long kamaut long dispela kalabus bilong Satan.
Taim mi no gat mariwana, mi save pilim sik, na mi mas painim yet, maski mi mas wokabaut longwe long kisim. Mariwana i bin go insait tru long blut bilong mi na mi bin ting olsem, sapos mi nogat spak brus, bai mi dai ya.
Taim mi save smok, ai bilong mi i save go ret olgeta na mi no save toktok planti. Mi save tingting planti long ol kainkain samting olsem driman tasol. Planti manmeri i lukim mi olsem mi wanpela longlong man tasol.
Na antap long en, ol drak i bin bagarapim skul bilong mi tu. Long 1992, ol i bin rausim mi long Dela Salle High School long Bomana bikos long spak brus tasol. I kam inap long nau mi no pinisim haiskul bilong mi.
Satan i wok long yusim dispela tupela samting long bosim laip bilong mi tru na i wok long bagarapim mi narapela kain tru. I luk olsem mi bin nogat hop long kamaut long dispela kalabus bilong Satan.
Tasol mi laik tenkyu long God long marimari bilong Em. Mi bin stat long ritim Tok bilong God long 2006 na Em i opim ai bilong mi long luksave long Em. Mi bin stat long beten long Bikpela long helpim mi long givim laip bilong mi long Em.
Na long marimari bilong Em, God i helpim mi. Em i opim we bilong mi i go skul long Reformed Churches Bible College long 14 Mile, Pot Mosby. God i helpim mi long lainim planti samting long Em yet. Na antap moa long en, Em yet i tainim bel bilong mi stret.
Long marimari bilong God, mi pinisim 5-pela yia long kolis na Em i singautim mi long kam mekim wok pasto long Lae. Nau yet, alkohol na drak i no moa bosim na kalabusim mi. Nogat, Krais i bosim mi. Olsem na mi mas givim biknem long Em na autim nem bilong Em tasol.
God i blesim mi wantaim wanpela gutpela meri tru na fopela pikinini. Tude em i namba siks yia bilong mi long wok pasto long Lae. Tenkyu, na God i ken mekim gut long yupela.