Yumi Olgeta i Stap Wokboi bilong Sin o Krais
Pasto Isidore Aufa
I tru tumas olsem i gat tupela bosman tasol i stap insait long dispela laip bilong yumi. Wanpela bosman em i sin na narapela bosman em i Jisas Krais. Husat em i bosim laip bilong yu? Sin? O Bikpela Jisas? Yumi olgeta manmeri bilong dispela graun i stap wokboi bilong dispela tupela bos. Yu wokboi bilong sin? O yu wokboi bilong Jisas Krais?
Rom 6 em i toktok long dispela tupela bosman. Sin em i no wanpela gutpela bosman. Em i save bringim yumi long bagarap, dai na hel tasol. Bipo, taim yumi bin stap long olpela bel, yumi bin stap aninit long dispela bosman nogut, sin (vv. 6, 7, 23).
Sin i bin kalabusim yumi na bosim laip bilong yumi na yumi bin kamap wokboi bilong em stret. Sin i gat strong na pawa long holim yu olsem kalabus man bilong em na mekim yu i kamap wokboi nating bilong em i go inap yu dai na pinis long hel oltaim (vv. 6, 19).
Sapos yu wanpela man o meri i save givim yu yet long mekim sin – yu save spak, smokim spak brus, paitim meri, mekim pasin pamuk, lukim ol piksa nogut, stil nabaut, kilim man, kros, pait, rape, mekim mani i kamap nambawan long laip bilong yu, kisim mani long ol rot nogut, tok nogut, daunim na bagarapim ol arapela, na planti ol arapela sin – yupela i mas harim na tingim gut dispela. Sin em i olsem wanpela man i kam na putim sen long nek bilong yu na fosim yu long bihainim laik bilong em. “Yu mekim dispela, mekim dispela, mekim dispela. Ha ha ha ha.” Sin i kalabusim yu na Satan em i lap na amamas long lukim yu stap wokboi bilong em. Em i bosman nogut.
Rom 6:12 i tok olsem, “Yupela i no ken larim sin i bosim bodi bilong yupela, dispela bodi i save dai. Nogut sin i pulim yupela na yupela i bihainim laik nogut bilong bodi.”
Laik bilong bodi bilong yumi em i no gutpela. Bodi bilong yumi i save laikim tru long mekim sin tasol. Olsem na yumi i noken givim bodi bilong yumi long sin bikos sin bai kalabusim bodi bilong yumi hariap tru na bringim yumi long bagarap tasol (vv. 12, 13, 19, 20).
Long Inglis (NIV) em i tok olsem, “Do not let sin reign in your mortal body so that you obey it’s evil desires.” Dispela word reign em i min olsem bosim, o stap olsem king o masta bilong wanpela samting. I luk olsem i gat wanpela sia king i stap insait long bodi bilong yumi. Olsem na askim i kam long yumi: Husat em i sindaun long sia king insait long bodi bilong yu na i bosim laip bilong yu? Bikpela Jisas? O sin?
Rom 6:12 em i tokim yumi olsem yumi i noken larim sin i sindaun long sia king insait long bodi bilong yumi bilong wanem em bai i bosim olgeta hap bodi bilong yumi. Em bai bosim han, lek, ai, maus, yau, tingting, na iven ples sem bilong yumi na tu olgeta hap bilong bodi bilong yumi na yusim ol olsem wokboi bilong em tasol long mekim sin.
Mi sori tru, tasol mi ken tok stret olsem sin i stap olsem bosman bilong planti man na meri. Planti lain i stap olsem ol wokboi na wokmeri nating bilong sin. Olgeta i stap long dispela rot bai i go long hel tasol.
Tasol brata na susa, mi laik toktok long dispela gutpela bosman bilong yumi, em i Bikpela bilong yumi Jisas Krais. God i laikim yumi tumas olsem na Em i salim pikinini bilong En Jisas Krais i kam long dispela graun long kisim bek yumi olgeta manmeri i bilip tru long em long dispela bosman nogut sin (Jon 3:16).
I luk olsem i gat wanpela sia king i stap insait long bodi bilong yumi. Olsem na askim i kam long yumi: Husat em i sindaun long sia king insait long bodi bilong yu na i bosim laip bilong yu? Bikpela Jisas? O sin?
Jisas Krais i marimari tru long yumi na givim laip bilong Em yet long yumi olgeta bilip manmeri long dispela graun taim Em i dai long yumi antap long diwai kros.
Long dai bilong Jisas, Em i rausim yumi long kalabus bilong sin. Em i kisim bek yumi long strong na pawa bilong sin. Yes, i tru olsem sin i gat bikpela strong long bosim yumi, tasol pawa na strong bilong Jisas em i narapela kain tru na i winim tru strong bilong sin.
Taim ol soldia i nilim bodi bilong Jisas antap long diwai kros, i olsem God i nilim ol sin bilong yumi long diwai kros (Kolosi 2:13). Sin bilong yumi i dai wantaim Jisas long diwai kros na em i no moa i bosim yumi nau (vv. 5-11).
Long diwai kros, Jisas i pinisim strong bilong sin insait long yumi. Nau, sin em i dai pinis na i nogat strong na pawa moa long bosim yumi ol Kristen. Tude, Jisas Krais, Bikpela bilong yumi, Em tasol i mas bosim laip bilong yumi.
Olsem na yumi mas givim bodi bilong yumi yet olsem ofa i go long Bikpela Jisas (Rom 12:1). Em yet i ken bosim bodi na bel na tingting na spirit bilong yumi wantaim. Em i gutpela bosman.
Long marimari bilong em, em i kisim bek yumi long bagarap bilong sin olsem tasol yumi i noken go bek moa long sin na givim yumi yet long en bai em i bagarapim laip bilong yumi (vv. 1, 15).
Sapos yumi givim yumi yet long sin, bai yumi kamap wokboi bilong Satan na sin. Tasol sapos yumi givim yumi yet long Jisas, bai yumi i kamap wokboi bilong Em na stretpela pasin bilong Em (v. 16).
Tru, bipo yumi i stap wokboi bilong sin, yumi i bin i stap olsem ol kalabusman bilong sin, tasol God i bin kisim bek yumi long wok bilong Jisas na mekim yumi i stap wokboi bilong stretpela pasin (vv. 17, 18).
Olsem na, yu laik i stap wokboi bilong husat? Sin? Sin bai bringim yu long bagarap, dai na hel. Dispela em i pe bilong em long yu (vv. 19, 21, 23).
Yu laik i stap wokboi bilong Bikpela Jisas? Bikpela Jisas em i gutpela bosman. Em bai mekim yu i kamap holi na stretpela pasin bilong Em bai kamap long yu. Na antap moa long en, Em bai givim yu pe bilong laip i stap gut oltaim (vv. 22, 23).
Husat em i bosim laip bilong yu? Husat em i king long laip bilong yu?